ఎమ్మెల్యేల రాజీనామాతో కర్ణాటకలో రాజకీయాలను నిశితంగా పరిశీలిస్తున్నామని రాష్ట్ర భాజపా అధ్యక్షుడు బీఎస్ యడ్యూరప్ప పేర్కొన్నారు. పరిస్థితులు అనుకూలిస్తే ప్రభుత్వ ఏర్పాటుకు సిద్ధమని ప్రకటించారు. "ప్రభుత్వం ఏర్పాటు చేసే యోచనలో ఉన్నారా?" అని అడిగిన ప్రశ్నకు యడ్యూరప్ప ఈ మేరకు సమాధానం ఇచ్చారు.
"చూద్దాం ఏం జరుగుతుందో? మేమేమైనా సన్యాసులమా? రాజీనామాల ప్రక్రియ ముగిశాక, స్పీకర్ నిర్ణయాన్ని చెప్పనివ్వండి. మాది జాతీయ పార్టీ. ఆ తర్వాత పార్టీ అధిష్ఠానంతో చర్చించి నిర్ణయం తీసుకుంటాం."
-బీఎస్ యడ్యూరప్ప, కర్ణాటక భాజపా అధ్యక్షుడు
అధికారం కోసమే ఈ సంక్షోభం: భాజపా
ముఖ్యమంత్రి పదవి కోసం కాంగ్రెస్, జేడీఎస్ మధ్య పోరుతోనే కర్ణాటకలో రాజకీయ సంక్షోభం ఏర్పడిందని భాజపా ఆరోపిస్తోంది. సీఎం కుమారస్వామి, కర్ణాటక సీఎల్పీ నేత సిద్ధరామయ్య మధ్య అంతర్యుద్ధం కొనసాగుతోందని కేంద్ర మంత్రి ప్రహ్లాద్ జోషి అన్నారు.
"దీనంతటికీ కారణం కాంగ్రెస్కు సరైన నాయకత్వం లేకపోవటమే. తమ లోపాన్ని కప్పిపుచ్చేందుకు ఇతరులపై నిందలు వేస్తున్నారు. ముందు మీ ఇళ్లు చక్కబెట్టుకోండి. కర్ణాటక కాంగ్రెస్ అధిష్ఠానంతో సంబంధం లేకుండా వ్యవహరిస్తోంది. సిద్ధరామయ్య, కుమారస్వామి మధ్య అంతరాలే ఈ స్థితికి తీసుకొచ్చాయి."
-ప్రహ్లాద్ జోషి, కేంద్ర మంత్రి
కాంగ్రెస్-జేడీఎస్ అధికార కూటమికి చెందిన ఎమ్మెల్యేల రాజీనామాతో రాష్ట్రంలో హైడ్రామా ఏర్పడింది. స్పీకర్కు రాజీనామా సమర్పించిన ఎమ్మెల్యేలు అటునుంచి ముంబయికి మకాం మార్చారు. అయితే రాజీనామాలపై శాసనసభ స్పీకర్ రమేశ్ కుమార్ ఎలాంటి నిర్ణయం తీసుకోలేదు.
ఆదివారం సెలవు కావంట వల్ల సోమవారం పరిశీలిస్తానని స్పీకర్ తెలిపారు. అయితే ప్రభుత్వం కొనసాగింపుపై అసెంబ్లీలోనే నిర్ణయిస్తామని స్పష్టం చేశారు రమేశ్ కుమార్. కర్ణాటకలో జులై 12న శాసన సభ సమావేశాలు ప్రారంభం కానున్నాయి.
మరో వైపు ఎమ్మెల్యేలను బుజ్జగించేందుకు కాంగ్రెస్ ప్రయత్నాలు మొదలుపెట్టింది. కీలక నేతలు బెంగళూరుకు పయనమయ్యారు. సీనియర్ నేత మల్లికార్జున ఖర్గేను కాంగ్రెస్ రంగంలోకి దింపింది.
ఇదీ చూడండి: 'కర్నాటకం'లో కాంగ్రెస్ ఆఖరి ప్రయత్నాలు
