ఉగ్రవాద నిర్మూలనకు చట్ట వ్యతిరేక కార్యకలాపాల నియంత్రణ చట్టం(యూఏపీఏ)లో ప్రభుత్వం చేసిన సవరణల బిల్లును రేపు రాజ్యసభలో ప్రవేశపెట్టనున్నారు. కొన్ని విపక్షాలు వ్యతిరేకిస్తున్న నేపథ్యంలో ఈ బిల్లుకు ఎట్టి పరిస్థితుల్లోనూ ఆమోదం పొందేలా ప్రభుత్వం కృషి చేస్తోంది.
రాజ్యసభలో తక్కువ మెజారిటీ కారణంగా భాజపా ఎంపీలందరూ తప్పకుండా హాజరు కావాలని ఆ పార్టీ మూడు వ్యాక్యాల విప్ జారీ చేసింది. ఇప్పటికే ఈ బిల్లుకు జులై 24న లోక్సభ ఆమోదం తెలిపింది.
బిల్లుకు ఆమోదం లభిస్తే..
ఇప్పటివరకు ఉగ్రవాద సంస్థలపైనే నిషేధం విధించేందుకు ప్రభుత్వానికి అవకాశం ఉండేది. ఈ బిల్లుకు ఆమోదం లభిస్తే తీవ్రవాదులపై వ్యక్తిగతంగా ఉగ్రవాద ముద్ర వేసే అవకాశం భారత ప్రభుత్వానికి కలుగుతుంది. ఫలితంగా సదరు వ్యక్తి ప్రయాణాలు, ఆర్థిక కార్యకలాపాలపై ఆంక్షలు ఉంటాయి. ఇతర దేశాలతో ఆ ఉగ్రవాది పూర్తి వివరాలను భారత్ పంచుకుంటుంది.
బిల్లు చట్టంగా మారగానే మొదటిగా పఠాన్కోట్, ముంబయి ఉగ్రదాడుల సూత్రధారులు మసూద్ అజార్, హఫీజ్ సయీద్లపై ఉగ్రవాద ముద్ర వేస్తామని కేంద్ర హోంశాఖ అధికార వర్గం ఇప్పటికే ప్రకటించింది.
ఇదీ చూడండి: జాతీయ వైద్య కమిషన్ బిల్లుకు పార్లమెంటు ఆమోదం
