భాజాపాపై తీవ్రస్థాయిలో విరుచుకుపడ్డారు బంగాల్ ముఖ్యమంత్రి మమతా బెనర్జీ. రాష్ట్రంలో భాజపా కేవలం అధికారం కోసమే ప్రయత్నిస్తోందని, ప్రజలను పట్టించుకోవట్లేదని విమర్శించారు. భాజపాను ఓ దుష్ట శక్తిగా అభివర్ణించారు.
తృణమూల్ కాంగ్రెస్ పార్టీ శ్రేణులు ఏర్పాటు చేసిన 'జాగో బంగ్లా' కార్యక్రమానికి ముఖ్య అతిథిగా హాజరయ్యారు దీదీ. ఈ నేపథ్యంలో తాను రాసిన 7పాటల ఆల్బమ్ 'సృష్టి'ని విడుదల చేశారు.
"ఓ వైపు మనకు కొవిడ్-19,డెంగీ ఉన్నాయి. మరోవైపు భాజపా లాంటి అతిపెద్ద మహమ్మారి కూడా ఉంది. భాజపా ఓ దుష్ట శక్తి బంగాల్ రాజకీయాల్లోకి ప్రవేశించాలంటే కొన్ని నిబంధనలకు కట్టుబడి ఉండాలి."
---మమతా బెనర్జీ, బంగాల్ ముఖ్యమంత్రి.
కొన్ని రోజుల క్రితం భాజపా శ్రేణులు బంగాల్ వీధుల్లో ర్యాలీలు నిర్వహించారు. వారిని అడ్డుకునేందుకు పోలీసులు యత్నించగా తీవ్ర ఉద్రిక్తతకు దారితీసింది. ర్యాలీకి అనుమతి తీసుకోలేదని, కొవిడ్-19 నిబంధనలకు విరుద్ధంగా ర్యాలీ జరిగిందని బంగాల్ ప్రభుత్వం స్పష్టం చేసింది.
నిరాడంబరంగా దుర్గా పూజ
కొవిడ్-19 నిబంధనలకు కట్టుబడి దుర్గా పూజ కమిటీలు పూజలు నిర్వహించాలని దీదీ సూచించారు. చాలా రాష్ట్రాల్లో ఈసారి దుర్గా ఉత్సవాలను రద్దు చేశారని తెలిపారు. తగు జాగ్రత్తలతో పూజ చేసుకోవాలని స్పష్టం చేశారు.
ఇదీ చదవండి :కరోనా వేళ బిహార్లో 'పోస్టల్ బ్యాలెట్' వైపే మొగ్గు
