ఆహ్లాదం పంచే ఈ 'పోస్టాఫీస్' మీకు తెలుసా​!

పచ్చని ప్రకృతిలో... పక్షుల కిలకిలారావాలు... కుందేళ్ల గంతులు... వింటుంటే ఏదో అడవి గురించో.. అక్కడి జీవజాలం గురించో చెప్తున్నారని అనుకుంటున్నారా... ? కానేకాదు ఇది ఓ పోస్టాఫీసు. ఇక్కడ ప్రత్యేకతలు చూసేయండి మరి.

అది బళ్లారి పట్టణం... నగరం నడిబొడ్డున రాయల్ సర్కిల్ వద్ద ఓ భవనం ఉంటుంది​. ఇందులో ఓ ప్రభుత్వ కార్యాలయం. అడుగుపెట్టిన వారికి మనం వచ్చింది సరైన చోటుకేనా అనే అనుమానం కలుగుతుంది. బోర్డు చూసాక కాస్త స్థిమిత పడతారు. ఎందుకంటే ఆ కార్యాలయం ఉంటుందీ...... వెళ్లగానే శాంతికి నిలయమైన పావురాళ్ల కువకువలు చెవిని తాకుతాయి. ఆ వెంటనే కుందేళ్లు గంతులేస్తూ ఆహ్లాదాన్నందిస్తాయి. అదే బళ్లారి రాయల్ సర్కిల్ పోస్టాఫీస్​.

2016 సంవత్సరంలో ఆఫీస్ సూపరింటెండెంట్​గా ఉన్న కె. బసవరాజా అనే అధికారి మొదటగా నాలుగు పావురాళ్లను తీసుకొచ్చి ఆఫీసులో సాకడం మొదలుపెట్టారు. ప్రస్తుతం వాటి సంఖ్య 16కు చేరింది. బసవరాజా సండూర్ నుంచి కుందేళ్లనూ తెచ్చారు. వాటి సంఖ్య పెరుగుతూ వస్తోంది.

ఆఫీస్ ప్రారంభమవగానే కపోతాలు గూళ్లను విడిచి ఎగిరిపోతాయి. బయటి ఆవరణంలో గింజల్ని తింటూ ఉంటాయి. ఆఫీసు ముగిసే సమయానికి తిరిగి గూళ్లకు చేరుకుంటాయి. వాటి ఆలనా పాలనా పోస్టాఫీస్​ ఉద్యోగి కృష్ణమూర్తి చూస్తూ ఉంటారు.

కన్నపిల్లల్ని చూడగానే ముఖంలోని అలసట అంతా ఎలా మాయమవుతుందో పావురాళ్లు, కుందేళ్లని చూడగానే మాకు అదే విధమైన భావన కలుగుతుందంటారు పోస్టాఫీస్​లో పనిచేసే జ్యోతి అనే అధికారిణి... బళ్లారికి వెళ్తే ఈ పోస్టాఫీస్​​ను చూస్తారు కదూ!