కరోనా వైరస్పై పోరును కేంద్రం మరింత ముమ్మరం చేస్తోంది. రానున్న రోజుల్లో పరిస్థితులను దృష్టిలో పెట్టుకుని.. వెంటిలేటర్ల సంఖ్యను పెంచాలని నిర్ణయించింది. ఇందుకోసం ఆటోమొబైల్ సంస్థలను సాయం కోరింది. తమ వద్ద ఉన్న వసతులతో వెంటిలేటర్లను తయారు చేయాలని కోరింది.
ప్రస్తుతం దేశవ్యాప్తంగా వివిధ ఆసుపత్రుల్లో ఉన్న 14వేల వెంటిలేటర్లను.. కేవలం కరోనా బాధితులకు చికిత్స అందించడం కోసమే వినియోగిస్తున్నట్టు కేంద్రం స్పష్టం చేసింది.
భారత్ ఎలక్ట్రానిక్ లిమిటెడ్(భెల్) ఇప్పటికే వెంటిలేటర్ల తయారీ ప్రారంభించింది. స్థానిక ఉత్పత్తిదారులతో కలిసి.. రానున్న రెండు నెలల్లో 30వేల వెంటిలేటర్లను రూపొందించనున్నట్టు కేంద్రం పేర్కొంది.
ఎన్-95 మాస్కులు...
20వేల ఎన్-95 మాస్కులను వచ్చే వారం నుంచి డీఆర్డీఓ ఉత్పత్తి చేస్తుందని కేంద్ర ఆరోగ్యశాఖ స్పష్టం చేసింది. ఇప్పటికే 11.95 లక్షల ఎన్-95 మాస్కులు అందుబాటులో ఉన్నాయని పేర్కొంది.
దేశం లాక్డౌన్లో ఉన్న తరుణంలో ఎక్కడా వైద్య పరికారలు, నిత్యావసరాల కొరత ఏర్పడకుండా పౌర విమానయాన శాఖ జాగ్రత్తలు చేపట్టింది. ఇందుకోసం వివిధ రాష్ట్రాలు, సరఫరా ఏజేన్సీలతో కలిసి కార్గో ఫైట్లను నడిపేందుకు కృషిచేస్తున్నట్టు స్పష్టం చేసింది. దేశవ్యాప్తంగా నిత్యావసరాలను సరఫరా చేయడానికి ఎయిర్ ఇండియా, అనుసంధాన ఫ్లైట్లను వినియోగిస్తున్నట్టు పేర్కొంది.
వారి కుటుంబసభ్యుల కోసం...
జవాన్ల కుటుంబ సభ్యుల కోసం సీఆర్పీఎఫ్ ఓ హెల్ప్లైన్ను ఏర్పాటు చేసింది. ఇది 24 గంటలు అందుబాటులో ఉంటుందని స్పష్టం చేసింది. కరోనా వైరస్ నేపథ్యంలో క్విక్ రియాక్షన్ టీమ్స్(క్యూఆర్టీ)ను కూడా ఏర్పాటు చేసింది.
"ఇలాంటి గడ్డు పరిస్థితుల్లోనూ అనేక మంది జవాన్లు తమ ఇళ్లకు దూరంగా ఉంటున్నారు. వారందరి కుటుంబసభ్యులను చూసుకునే బాధ్యత ఉంది. వారిని జాగ్రత్తగా చూసుకునేందుకు అన్ని వ్యవస్థలు సరిగ్గా ఉంటేనే.. జవాన్లు ఎలాంటి ఒత్తిడికి గురికాకుండా పనిచేస్తారు."
-- సీఆర్పీఎఫ్.
ఇదీ చూడండి:- కరోనా డ్యూటీలో చేరేందుకు 20 గంటలు నడుస్తూ...
