అసోం మాజీ ముఖ్యమంత్రి తరుణ్ గొగొయి(84) ఆరోగ్యం విషమంగానే ఉన్నట్టు సమాచారం. మూత్రపిండాల పనితీరు మెరుగయ్యేందుకు సుమారు 6 గంటలపాటు డయాలసిస్ చేసినా.. ఆరోగ్య స్థితిలో మాత్రం ఏ మార్పులు కనిపించలేదని ఆ రాష్ట్ర ఆరోగ్య మంత్రి హిమంత బిశ్వ శర్మ తెలిపారు. అయితే.. వెంటిలేషన్పై ఉన్న ఆయనకు సోమవారం మరోసారి డయాలసిస్ నిర్వహించనున్నట్టు చెప్పారు మంత్రి. అంతవరకూ వైద్యులు ఆయన ఆరోగ్య పరిస్థితిని పరిశీలించనున్నట్టు వెల్లడించారు శర్మ.
తరుణ్ గొగొయి ఆగస్టు 25న కరోనా బారినపడ్డారు. వైరస్ నుంచి కోలుకున్న అనంతరం.. అనారోగ్య సమస్యలతో ఈ నెల 2న గువాహటి మెడికల్ కాలేజ్ ఆసుపత్రిలో చేరారు. అయితే.. గత శనివారం(21వ తేదీ) ఆయన ఆరోగ్య పరిస్థితి విషమించింది. ఈ నేపథ్యంలో రాబోయే 48 గంటలు కీలకమని వైద్య వర్గాలు ప్రకటించాయి.
ప్రముఖుల ఆరా..
మాజీ సీఎం ఆరోగ్య పరిస్థితిపై ప్రధాని నరేంద్ర మోదీ, రక్షణ మంత్రి రాజ్నాథ్ సింగ్ సహా.. కాంగ్రెస్ నాయకుడు రాహుల్ గాంధీ ఆరా తీశారని గొగొయి కుమారుడు గౌరవ్ గొగొయి తెలిపారు. తన తండ్రి ఆరోగ్యంపై ఇతర ముఖ్యమంత్రులు, నాయకులు అడిగి తెలుసుకుంటున్నట్టు చెప్పారు. ఆయన ఆరోగ్యం మెరుగవ్వాలని కాంక్షిస్తూ.. పలుచోట్ల ప్రజలు చేస్తున్న ప్రార్థనలు ఫలించాలని భావోద్వేగంతో అన్నారు గౌరవ్.
ఇవీ చదవండి:
