రాష్ట్రపతి, ఉపరాష్ట్రపతి, ప్రధాని ప్రయాణాల కోసం అమెరికాకు చెందిన బోయింగ్ సంస్థతో రెండు బీ777 విమానాలు తయారు చేయిస్తోంది భారత్. వీటిలో ఒకటి ఈ వారంలో భారత్కు రావాల్సి ఉన్నప్పటికీ.. సాంకేతిక కారణాల వల్ల డెలివరీ ఆలస్యమవుతుందని ఎయిర్ ఇండియా అధికారులు వెల్లడించారు.
బోయింగ్ నుంచి విమానాన్ని తీసుకునేందుకు ఎయిర్ ఇండియా అధికారులు ఈ నెల తొలినాళ్లల్లోనే అమెరికాకు వెళ్లారు. కానీ విమాన డెలివరీ ఆలస్యమైంది. మరో విమానం సెప్టెంబర్లో భారత్కు చేరుతుందని అధికారులు ఆశాభావం వ్యక్తం చేశారు.
కరోనాతో...
వాస్తవానికి ఈ విమానాలను బోయింగ్ జులైలోనే డెలివరీ చేయాల్సి ఉంది. కొవిడ్-19 సంక్షోభం కారణంగా సకాలంలో రాలేకపోయినట్లు అధికారులు చెప్పారు. ఈ రెండు బీ777 విమానాలను భారత వాయుసేన పైలట్లు ఆపరేట్ చేస్తారు. వీటి నిర్వహణ బాధ్యత మాత్రం ఎయిర్ ఇండియాదే.
747 నుంచి 777కు...
ప్రధాని, రాష్ట్రపతి, ఉప రాష్ట్రపతి ప్రస్తుతం బీ747 విమానాల్లో ప్రయాణిస్తున్నారు. ఇది 'ఎయిర్ ఇండియా వన్' గుర్తును కలిగి ఉంటుంది. ఎయిర్ ఇండియా పైలట్లే వీటిని ఆపరేట్ చేస్తున్నారు.
బోయింగ్ తయారు చేస్తున్న బీ777 విమానాల్లో అత్యాధునిక రక్షణ వ్యవస్థ, సెల్ఫ్ ప్రొటెక్షన్ సూట్లను ఉపయోగించనున్నారు. రెండు రక్షణ వ్యవస్థలను 190 మిలియన్ డాలర్లకు విక్రయించేందుకు అమెరికా ఫిబ్రవరిలో అంగీకరించింది.
ఇదీ చూడండి:- 'ఎల్ఏసీ' వ్యూహాత్మక ప్రాంతాల్లో భారత క్షిపణులు
