'ఆనకట్ట కూల్చిన పీతలను అరెస్టు చేయండి'

మహారాష్ట్రలోని దేవేంద్ర ఫడణవీస్​ ప్రభుత్వం తీరుపై నేషనలిస్ట్ కాంగ్రెస్ పార్టీ ప్రధాన కార్యదర్శి జితేంద్ర విమర్శలు గుప్పించారు. రత్నగిరిలోని తివారే ఆనకట్ట పీతల వల్ల కూలిందని నీటి సంరక్షణశాఖ మంత్రి అనడంపై ఆగ్రహం వ్యక్తం చేశారు. పీతలు డ్యామ్ కూల్చితే... వాటినే అరెస్టు చేయాలని డిమాండ్​ చేశారు.

మహారాష్ట్రలోని అధికార భాజపా ప్రభుత్వ తీరుపై నేషనలిస్ట్ కాంగ్రెస్ పార్టీ విరుచుకుపడింది. రత్నగిరిలోని ఆనకట్ట పీతల వల్లే కూలిపోయిందని నీటి సంరక్షణ మంత్రి ప్రకటించడాన్ని తప్పుపట్టింది. పీతలు తప్పు చేస్తే వాటినే అరెస్టు చేయాలంటూ వినూత్నంగా నిరసన చేపట్టింది.

ఎన్​సీపీ ప్రధాన కార్యదర్శి జితేంద్ర కొన్ని పీతలు తీసుకుని నౌపాడ పోలీసు స్టేషన్​కు చేరుకున్నారు. ఆనకట్ట కూలడానికి కారణమైన పీతలను అరెస్టు చేయాలంటూ నిరసన చేపట్టారు.

"భాజపా ప్రభుత్వం నిస్సిగ్గుగా ప్రవర్తిస్తోంది. ఆనకట్ట కూలడానికి కారణమైన గుత్తేదారును రక్షించడానికి నీటి సంరక్షణశాఖ మంత్రి సావంత్ ప్రయత్నిస్తున్నారు. ఆనకట్ట కూలడానికి పీతలే కారణమని అంటున్నారు. అలా అయితే ఆ పీతలనే అరెస్టు చేయండి." - జితేంద్ర, ఎన్​సీపీ ప్రధాన కార్యదర్శి.

కొల్హాపూర్​ ఎన్​సీపీ యుజవన విభాగం అధ్యక్షుడు మెహబూబ్​ షేక్ ఈ ఘటనపై షాహుపురి పోలీసు స్టేషన్​లో ఫిర్యాదు చేశారు. ఆనకట్ట కూల్చిన పీతలపై కేసు నమోదు చేసి అరెస్టు చేయాలని డిమాండ్ చేశారు.

ఇదీ జరిగింది..

మహారాష్ట్ర రత్నగిరిలోని తివారే ఆనకట్ట భారీ వర్షాలకు కూలిపోయింది. ఈ విషాద ఘటనలో 23 మంది కొట్టుకుపోయారు. వీరిలో 19 మంది మరణించగా... మిగిలిన వారి ఆచూకీ ఇంకా లభ్యం కాలేదు. అయితే ఈ ఆనకట్ట కేవలం పీతల వల్లే కూలిపోయిందని ఈ రాష్ట్ర నీటి సంరక్షణశాఖ మంత్రి తానాజీ సావంత్ అన్నారు.

ఇదీ చూడండి: 'పీతల వల్లే తివారె ఆనకట్ట​కు గండి'