చైనాతో సరిహద్దు వివాదం కొనసాగుతున్న నేపథ్యంలో కీలక వ్యాఖ్యలు చేశారు విదేశాంగ మంత్రి జైశంకర్. చైనాతో సరిహద్దు వాస్తవాదీన రేఖను ఏకపక్షంగా మార్చడానికి చేసే ఏ ప్రయత్నాన్ని భారత్ అంగీకరించదని ఉద్ఘాటించారు. రెండు దేశాల మధ్య ఉన్న ఒప్పందాన్ని గౌరవిస్తూ.. సరిహద్దుల్లో సాధారణ పరిస్థితుల పునరుద్ధరణకు ప్రయత్నించాలన్నారు.
సరిహద్దు ప్రాంతాల్లో శాంతి, ప్రశాంత వాతావరణం భారత్-చైనాల మధ్య విస్తృత సహకారానికి ఆధారంగా నిలిచాయని.. అయితే కరోనా వల్ల సంబంధాలు దెబ్బతిన్నాయన్నారు. ఆల్ ఇండియా రేడియోలో ప్రసారమైన సర్దార్ పటేల్ మెమోరియల్లో ప్రసంగించారు జైశంకర్.
వారసత్వంగా వచ్చిన సవాళ్లను, కొత్త పరిస్థితులను పరిష్కరించడం వల్లే మూడు దశాబ్దాలుగా ఇరు దేశాల మధ్య సంబంధాలు స్థిరంగా ఉన్నాయని విదేశాంగ మంత్రి పేర్కొన్నారు.
సరిహద్దు ఉగ్రవాదాన్ని ప్రస్తావిస్తూ.. భారత్ దీనిని ఎదుర్కోవడంలో రాజీపడాల్సిన అవసరం లేదన్నారు విదేశాంగ మంత్రి. ప్రపంచం అభివృద్ధి చెందుతున్న క్రమంలో తన పొరుగు దేశాలపై భారత్ అత్యంత శ్రద్ధ చూపుతుందన్నారు.
ఇదీ చూడండి: 'చైనా ఆక్రమణ' వ్యాఖ్యలపై రాజ్నాథ్ మండిపాటు
