12 మందితో సోమవారం గల్లంతైన... భారత వైమానిక దళం (ఐఏఎఫ్)కు చెందిన ఏఎన్-32 ఎయిర్క్రాఫ్ట్ గాలింపు చర్యలు మరింత ముమ్మరం చేశారు అధికారులు.
ప్రతికూల వాతావరణం కారణంగా విమాన అన్వేషణకు ఆటంకాలు ఏర్పడుతున్నట్లు ఐఏఎఫ్ తెలిపింది. వెలుతురు లేమి కారణంగా రాత్రి పూట అత్యాధునిక లైట్లు, సెన్సార్లతో కూడిన సీ-130జే హర్క్యులెస్ ఎయిర్ క్రాఫ్ట్ విమానంతో మాత్రమే గాలింపు నిర్వహిస్తున్నట్లు తెలిపారు అధికారులు.
విమానాలతో మాత్రమే కాకుండా.. పోలీసులు, స్థానిక ఏజెన్సీ అధికారులు కూడా గాలింపు చర్యల్లో పాల్గొంటున్నట్లు తెలిపింది. భారత నావికా దళానికి చెందిన పీ-81 విమానం శుక్రవారం ఉదయం తిరిగి గాలింపు ఆపరేషన్లో పాల్గొంటుందని వెల్లడించింది.
గురువారం మొత్తం 4 ఎంఐ-17 హెలికాఫ్టర్లు, మూడు అత్యాధునిక హెలికాప్టర్లు, రెండు సుఖోయ్-30 విమానాలు, ఒక సీ-30 విమానం సహా మరో మానవ రహిత విమానంతో గాలింపు చేపట్టినా ఎలాంటి ఆధారాలు లభ్యం కాలేదని ఐఏఎఫ్ పేర్కొంది.
ప్రమాదం ఎప్పుడు,ఎక్కడ ?
రష్యాలో తయారైన ఏఎన్-32 విమానం అసోంలోని జోర్హట్ విమానశ్రయం నుంచి మధ్యాహ్నం 12:27 గంటల ప్రాంతంలో గాల్లోకి ఎగిరింది. బయలుదేరిన అరగంట తర్వాత విమానానికి ఏటీసీతో సంబంధాలు తెగిపోయాయి.
భర్త కాక్ పిట్లో.. భార్య ఏటీసీలో
జాడ లేకుండా పోయిన ఏఎన్-32 ఎయిర్క్రాఫ్ట్.. ఓ నవ జంట జీవితాలను ఆందోళనలో పడేసింది.
అసలు విషయం ఏంటంటే.. ఏఎన్-32 విమానాన్ని నడిపిస్తున్న పైలట్ ఆశిశ్ తన్వార్ కాక్ పిట్లో ఉన్నప్పుడు ఆయన భార్య సంధ్యా తన్వార్ ఏటీసీలో విధులు నిర్వహిస్తున్నారు.
చైనా సరిహద్దులకు చేరిన తర్వాత విమానంతో సంబంధాలు తెగిపోయినట్లు మొదట గుర్తించింది సంధ్యే కావడం గమనార్హం. వీరిద్దరికి గత ఏడాదే పెళ్లయింది. ఇంతలోనే ఇలాంటి చేదు అనుభవం ఎదుర్కోవాల్సి వస్తుందని ఈ నవ దంపతులు ఊహించి ఉండరు.
అరుణాచల్ ప్రదేశ్ అడవుల్లో పొగలు
అరుణాచల్ ప్రదేశ్ సియంగ్ జిల్లాలోని ఓ గ్రామంలో కొండల మధ్య దట్టమైన పొగను గమనించినట్లు స్థానికులు.. అధికారులకు సమాచారమిచ్చారు. వెంటనే అప్రమత్తమైన వారు కొండ ప్రాంతాల్లో గాలింపు ముమ్మరం చేశారు.
గాలింపు చర్యలకు ప్రయత్నాలు ముమ్మరం చేయాలని ఆ రాష్ట్ర ముఖ్యమంత్రి.. సియాంగ్, వెస్ట్ సియంగ్, లోవర్ సియంగ్, షి-యోమి జిల్లా డిప్యూటీ కమిషనర్లను అదేశించారు. వెంటనే రంగంలోకి దిగిన అధికారులు మూడు బృందాలుగా ఏర్పడి కొండ ప్రాంతాల్లో గాలింపు చేపడుతున్నారు.
ఇదీ చూడండి:నీతిఆయోగ్ పునరుద్ధరించిన ప్రధాని మోదీ
