వాస్తవాధీన రేఖ వెంట చైనాతో ఉద్రిక్తతలు నెలకొన్న ప్రస్తుత తరుణంలో అగ్రదేశాలతో ద్వైపాక్షిక సంబంధాలు బలోపేతం చేసే దిశగా అడుగులు వేసింది భారత్. ఫ్రాన్స్, జర్మనీలతో వివిధ అంశాలపై సంప్రదింపులు జరిపినట్లు విదేశాంగ శాఖ కార్యదర్శి హర్షవర్ధన్ శ్రింగ్లా వెల్లడించారు. చైనాతో సరిహద్దు వివాదం అంశమై భారత అభిప్రాయాలను రెండు దేశాలు ఆసక్తిగా విన్నాయని చెప్పారు.
వీడియో కాన్ఫరెన్స్ ద్వారా జరిగిన ఈ భేటీల్లో జీ-20 కూటమికి 2022లో భారత అధ్యక్షత సహా వివిధ అంశాలపై కలిసి పనిచేసేందుకు ఫ్రాన్స్, జర్మనీ దేశాలు ఆసక్తి చూపాయని విశ్వసనీయ వర్గాల సమాచారం. ఆర్థిక సహకారం, పెట్టుబడుల తరలింపు, ఎగుమతి- దిగుమతులు, సాంకేతిక రంగంలో భాగస్వామ్యంపై భారత్తో కలిసి పనిచేసేందుకు ఇరుదేశాలు సుముఖత తెలిపాయి.
భద్రతా మండలి కోసం..
ఐక్యరాజ్యసమితి భద్రతా మండలిలో భారత్ తాత్కాలిక సభ్యదేశంగా ఎన్నికైంది. త్వరలో భద్రతా మండలి పదవీకాలం ప్రారంభం కానున్న నేపథ్యంలో రెండు పెద్ద దేశాలతో సంభాషణ భారత్కు లాభించనుందని సమాచారం.
ఫ్రాన్స్.. రఫేల్, కరోనా
ఇండో-పసిఫిక్ ప్రాంతంలో భారత్తో కలిసి పనిచేసేందుకు ఫ్రాన్స్ ఆసక్తి చూపిందని సమాచారం. సముద్ర సేతు కార్యక్రమం ద్వారా భారత్, ఫ్రాన్స్ నౌకాదళాలు కరోనా వేళ ఆయా దేశాల్లో చిక్కుకుపోయినవారిని స్వదేశాలకు చేర్చేందుకు సంయుక్త ఆపరేషన్ చేపట్టాయి. రాబోయే నెలల్లో అత్యాధునిక రఫేల్ యుద్ధ విమానాలు భారత్కు చేరతాయని అంచనా. ఈ నేపథ్యంలో ఫ్రాన్స్ విదేశాంగ కార్యదర్శితో ఈ దిశగా కీలక చర్చ జరిగిందని తెలుస్తోంది.
ఇదీ చూడండి: సరిహద్దు వివాదంపై భారత్- అమెరికా రక్షణ మంత్రుల చర్చ!
