ఈవీఎంల పనితీరుపై మరోసారి విపక్షాలు విమర్శలు గుప్పించాయి. దేశంలో మూడో విడత పోలింగ్ జరుగుతున్న వేళ ఎలక్ట్రానిక్ ఓటింగ్ యంత్రాల పనితీరుపై సమాజ్వాదీ పార్టీ అధ్యక్షుడు అఖిలేశ్ యాదవ్ అనుమానాలు లేవనెత్తారు.
"దేశవ్యాప్తంగా ఉన్న ఈవీఎంలలో లోపం ఉంది లేదా భాజపాకు ఓటు పడుతుంది. ఎన్నికల అధికారులకు ఈవీఎంలపై సరైన శిక్షణ లేదని కలెక్టర్ చెబుతున్నారు. 350కిపైగా ఈవీఎంలను మార్చారు. రూ.50 వేల కోట్ల ఖర్చుతో నిర్వహిస్తున్న ఎన్నికల్లో ఇది ముమ్మాటికీ ఈసీ వైఫల్యమే.
సాక్షాత్తు జిల్లా కలెక్టర్ చెప్పిన మాటలు మనం నమ్మాలా లేక ఎవరో చెప్పిన మాటలా?"-అఖిలేశ్ యాదవ్ ట్వీట్
మూడో విడత పోలింగ్లో ఓటు హక్కు వినియోగించుకున్న అనంతరం అఖిలేశ్ మీడియాతో మాట్లాడారు. రాంపుర్, బదాయు నియోజకవర్గాల్లో ఈవీఎంల లోపాలపై వస్తున్న నివేదికలను ఈసీ పరిశీలించాలని కోరారు.
"తన కూతురు పోటీ చేస్తున్నందున రాష్ట్ర మంత్రి బదాయులో పోలింగ్ను ప్రభావితం చేసేందుకు ప్రయత్నిస్తున్నట్లు నాకు తెలిసింది. అధికారులు ఈవీఎంలపై యంత్రాంగానికి సరైన శిక్షణ లేదని చెబుతున్నారు. ఇదేనా ప్రభుత్వం చెబుతున్న డిజిటల్ ఇండియా? "
-అఖిలేశ్ యాదవ్, సమాజ్వాదీ పార్టీ అధ్యక్షుడు
- ఇదీ చూడండి: భారత్ భేరి: మూడో దశ పోలింగ్ సమాప్తం
