దిల్లీ నుంచి మాస్కోకు బయల్దేరిన ఎయిర్ఇండియా విమానాన్ని మధ్యలోనే వెనక్కి మళ్లించారు. విమానంలోని ఓ పైలట్కు కరోనా సోకినట్లు తెలియడం వల్ల ఈ నిర్ణయం తీసుకున్నట్లు అధికారులు తెలిపారు. అయితే విమానంలో ప్రయాణికులు ఎవరూ లేరని స్పష్టం చేశారు.
"వందేభారత్ మిషన్లో భాగంగా మాస్కోలో చిక్కుకుపోయిన భారతీయులను వెనక్కి తీసుకురావడానికి ఏ320 విమానం బయల్దేరింది. విమానం ఉజ్బెకిస్థాన్ గగనతలంలోకి ప్రవేశించిన సమయంలో పైలట్కు కరోనా పాజిటివ్గా తేలిన విషయాన్ని గ్రౌండ్ సిబ్బంది గుర్తించారు. దీంతో విమానాన్ని వెనక్కి తీసుకురావాలని పైలట్లను కోరాం. శనివారం మధ్యాహ్నం 12.30 గంటలకు విమానం దిల్లీకి చేరుకుంది."
-ఎయిర్ఇండియా సీనియర్ అధికారి
విమానంలో ఉన్న సిబ్బందిని క్వారంటైన్కు తరలించినట్లు అధికారులు తెలిపారు. భారతీయులను వెనక్కి తెచ్చేందుకు మరో విమానాన్ని మాస్కోకి పంపినట్లు స్పష్టం చేశారు.
ఇదీ చదవండి: విదేశీ వ్యవహారాల శాఖలో కరోనా కలకలం!
