భారత వైమానికదళ వింగ్ కమాండర్ అభినందన్ వర్ధమాన్... మరోసారి మిగ్-21 విమానంలో యుద్ధ విన్యాసాలు చేశారు. పాక్ సేనకు చిక్కి, విడుదలైన అనేక నెలల తర్వాత తొలిసారిగా విమానాన్ని నడిపారు. పంజాబ్ పఠాన్కోట్ వైమానిక స్థావరం నుంచి వాయుసేన అధినేత బీఎస్ ధనోవాతో కలిసి ఆకాశ వీధుల్లో దూసుకెళ్లారు వర్ధమాన్.
వాయుసేన అధిపతిగా ధనోవా పదవీకాలం మరికొద్దిరోజుల్లో పూర్తి కానుంది. ఈ నేపథ్యంలో తన చివరి యుద్ధ విన్యాసాలు వర్ధమాన్తో చేయడం ఎంతో ఆనందంగా ఉందని తెలిపారు ఆయన. అభినందన్ తండ్రితోనూ మిగ్-21లో యుద్ధ విన్యాసాలు చేసినట్లు గుర్తు చేసుకున్నారు ధనోవా.
"అభినందన్తో కలిసి ఆకాశ వీధుల్లోకి దూసుకెళ్లడం నాకు ఎంతో గర్వకారణం. 1998లో నేను కూడా పైలట్ విధులకు దూరమయ్యాను. తిరిగి విధుల్లో చేరేందుకు నాకు 9 నెలలు పట్టింది. అభినందన్ 6 నెలల కంటే తక్కువ సమయంలోనే తిరిగి వచ్చాడు. మిగ్-21 శిక్షకుడిగా మళ్లీ చేరాడు. అది ఎంతో గొప్ప విషయం. మా ఇద్దరికీ రెండు లక్షణాలు ఒకేలా ఉన్నాయి. అందులో మొదటిది... ఇద్దరం విధులకు దూరమయ్యాం. రెండవది ఇద్దరం పాకిస్థాన్పై పోరాడాం. నేను కార్గిల్లో, అభినందన్ బాలాకోట్లో శత్రువులపై యుద్ధం చేశాం. నా చివరి యుద్ధ విన్యాసాలు ఒక యోధుడితో చేసినందుకు నాకు చాలా గర్వంగా ఉంది."
- బీఎస్ ధనోవా, వాయుసేన అధిపతి
అధీనం నుంచి వీర్చక్ర వరకు...
పుల్వామా దాడి అనంతరం భారత వాయుసేన(ఐఏఎఫ్).. పాక్లోని జైషే మహ్మద్ ఉగ్రస్థావరాలపై దాడులు చేసింది. ఆ తర్వాత భారత సైనిక స్థావరాలే లక్ష్యంగా.. ఫిబ్రవరి 27న మనదేశ గగనతలంలోకి చొరబాటుకు యత్నించిన పాక్ విమానాలను తిప్పికొట్టింది ఐఏఎఫ్. ఈ పోరాటంలో తాను నడుపుతున్న మిగ్-21 విమానం ప్రత్యర్థి భూభాగంలో కూలిపోయిన కారణంగా దాయాది సేనలకు చిక్కారు అభినందన్. అంతర్జాతీయ ఒత్తిళ్ల నేపథ్యంలో మార్చి 2న అభినందన్ను భారత్కు అప్పగించింది పాక్.
పాక్ సైన్యం అధీనం నుంచి భారత్ చేరుకున్న అభినందన్కు తీవ్ర గాయాలైనందున విధుల నుంచి తాత్కాలికంగా తప్పించారు అధికారులు. రక్షణ, నిఘా సంస్థల అధికారుల సమక్షంలో శారీరక, మాససిక పరీక్షలు నిర్వహించారు. బెంగళూరులోని ఇన్స్టిట్యూట్ ఆఫ్ ఏరోస్పేస్ మెడిసిన్ ధ్రువీకరణతో ఐఏఎఫ్ చీఫ్తో కలిసి మరోసారి గగనతలంలో దూసుకెళ్లారు అభినందన్.
బాలాకోట్ వైమానికి దాడుల్లో పాక్ సైన్యంతో వీరోచితంగా పోరాడినందుకు.. యుద్ధ సమయాల్లో సైనికులను సత్కరించే మూడో అత్యున్నత అవార్డు.. వీర్చక్ర పురస్కారాన్ని ప్రదానం చేసింది కేంద్రం.
ఇదీ చూడండి: ధనోవా సమక్షంలో అభినందన్ యుద్ధ విన్యాసాలు!
