అసోం రాజధాని గువాహటికి 45 కిలో మీటర్ల దూరంలో ఉన్న రంగ్మహాల్ అనే గ్రామంలో మోతీబార్ రెహ్మాన్, ఆయన కుటుంబం నివాసముంటోంది. వారి కుటుంబం ఇస్లాం మతానికి చెందినప్పటికీ.. 5 శతాబ్దాలుగా ఓ శివాలయానికి సంరక్షకులుగా ఉంటోంది. మోతీబార్ రెహ్మాన్ రోజూ ఉదయాన్నే 5గంటలకు నిద్ర లేచి నమాజు చేస్తాడు. అనంతరం వారి ఇంటికి దగ్గర్లో ఉన్న పవిత్ర బుర్హా గోసైర్ థాన్ శివాలయాన్ని శుభ్రం చేసేందుకు వెళ్తాడు. చాలా ఏళ్లుగా ఇది ఆయన దినచర్యలో భాగం.
ఐదు శతాబ్దాల నుంచి ఆ శివాలయానికి రెహ్మాన్ కుటుంబమే సంరక్షకులుగా ఉంటోంది. తన పూర్వీకుల్లానే మోతీబార్ కూడా రోజూ ఉదయం మందిరాన్ని శుభ్రం చేసి భక్తితో దీపాలను వెలిగిస్తాడు.
"నా చిన్నతనం నుంచి భగవంతుడికి ఈ సేవ చేస్తున్నాను. అంతకు ముందు మా నాన్న ఈ పని చేసేవారు. మేము ఇస్లాంను అనుసరిస్తాం. రోజూ ఈ స్థలాన్ని శుభ్రం చేసి, దీపం, ధూపం వెలిగిస్తుంటాను. ప్రస్తుతం నా వయసు పెరుగుతోంది. నా తదనంతరం నా పిల్లలు ఈ బాధ్యతలను చేపడతారని ఆశిస్తున్నా."
-మోతీబార్ రెహ్మాన్, ఆలయ సంరక్షకులు
శివాలయానికే రక్షకులుగా ఎందుకు?
రెహ్మాన్ తొలి తరానికి చెందిన బోర్హన్సా అనే వ్యక్తికి ఒక రోజు శివుడు కలలో ప్రత్యక్షమయ్యాడట. తను ఈ ప్రదేశంలో ఉండాలనుకుంటున్నట్లు, ఇకపై తానుండే స్థలాన్ని పర్యవేక్షించాల్సిన బాధ్యత బోర్హన్సా కుటుంబానిదే అంటూ చెప్పాడట. అంతే కాకుండా తమ కుటుంబం నుంచి మాత్రమే సేవలను స్వీకరిస్తానని శివుడు తన పూర్వికులకు చెప్పినట్లు రెహ్మాన్ తెలిపాడు. అప్పటి నుంచి ఆనవాయితీగా ఈ పద్ధతి కొనసాగుతోంది. ఇక్కడ కొలువై ఉన్న పరమేశ్వరుడు ప్రతి ఒక్కరి మాట వింటాడని, అందరి కోర్కెలను నెరవేరుస్తాడని భక్తులు విశ్వసిస్తున్నారు.
