కరోనా కేసులు నమోదైన తొలినాళ్లలో ప్రభుత్వ ఆస్పత్రులలో చికిత్స అందించేవారు. ఆ తర్వాత కేసుల సంఖ్య క్రమక్రమంగా పెరిగాక ప్రైవేటు ఆస్పత్రులకూ చికిత్స చేసేందుకు అనుమతిచ్చారు. అయితే ప్రైవేటు ఆస్పత్రుల్లో కరోనా చికిత్సకు అయ్యే ఖర్చు భరించలేని స్థాయిలో ఉంటోందని 57 శాతం మంది ఆందోళన వ్యక్తం చేస్తున్నారు. సామాజిక మాధ్యమం లోకల్ సర్కిల్స్ నిర్వహించిన ఓ సర్వేలో ఇందుకు సంబంధించి ప్రజలు తమ అభిప్రాయాలను తెలిపారు. మొత్తం 40 వేల మంది ఈ సర్వేలో పాల్గొన్నారు.
ఆస్పత్రులలో రద్దీ, సరైన ప్రమాణాలు పాటించని కారణంగా వైరస్ బారిన పడే అవకాశాలు ఎక్కువగా ఉన్నాయని సర్వేలో పాల్గొన్న 46 శాతం మంది అభిప్రాయపడ్డారు. దేశంలో సరైన మౌలిక వైద్య సదుపాయాలు లేవని, అదే ప్రధాన సమస్య అని 32 శాతం మంది తెలిపారు.
ప్రభుత్వమే నిర్ణయించాలి..
ప్రభుత్వమే ప్రైవేటు ఆస్పత్రులలో కొవిడ్ చికిత్సకు అయ్యే ఖర్చును నిర్ణయించాలని, ఆస్పత్రులలో సదుపాయాలు, రేటింగ్స్ ఆధారంగా దీనిపై అంచనాకు రావాలని 61 శాతం మంది అభిప్రాయం వ్యక్తం చేశారు. ఆస్పత్రులలో రద్దీగా ఉండటం వల్ల చాలా సేపు నిల్చోవాల్సి వస్తోందని 16 శాతం మంది చెప్పారు.
