మధ్యప్రదేశ్ ఉజ్జయిని జిల్లాలో విషాదం చోటుచేసుకుంది. ఛత్రి చౌక్ ప్రాంతంలోని గోపాల్ మందిర్లో కల్తీ మద్యం సేవించి ఏడుగురు కూలీలు ప్రాణాలు కోల్పోయారు. మరికొంత మంది అనారోగ్యానికి గురయ్యారు. వారిలో పలువురి పరిస్థితి విషమంగా ఉన్నట్లు వైద్యులు తెలిపారు.
గోపాల్ మందిర్లో ఉదయం నలుగురు యువకులు రోడ్డు పక్కన పడి ఉండటాన్ని స్థానికులు గుర్తించి పోలీసులకు సమాచారం అందించారు. ఘటనా స్థలానికి చేరుకున్న పోలీసులు వారిని ఆసుపత్రికి తరలించారు. అందులో పిప్లోడా ప్రాంతానికి చెందిన శంకర్ లాల్, భేరుపురాకు చెందిన విజయ్ అప్పటికే మృతి చెందినట్లు వైద్యులు ధ్రువీకరించారు.
వారంతా కల్తీ మద్యం వల్లే మరణించారని వైద్య పరీక్షల్లో తేలినట్లు పోలీసులు తెలిపారు. కేసు నమోదు చేసుకొని దర్యాప్తు చేపట్టారు. ప్రస్తుతం ఇద్దరి మృతదేహాలకు శవపరీక్ష పూర్తి కాగా.. మిగతా పోస్టుమార్టం నివేదికల కోసం వేచి చూస్తున్నట్లు పోలీసు అధికారులు స్పష్టం చేశారు.
ఇదీ చూడండి: ట్రాఫిక్‌ పోలీస్‌ను కారు బానెట్పై లాక్కెళ్లిన ఆకతాయి
