'చర్మం చిత్రవధ చేస్తోంది.. వింత వ్యాధికి పరిష్కారమేది?'

శరీరమంతా పగుళ్లు.. పొడిబారిపోయిన చర్మం.. ఎండిపోయి నొప్పి పుట్టించే దేహం.. విపరీతమైన మంట.. ముడతలు పడుతున్న ముఖం.. ఇలా ఒక్కటేమిటి పదేళ్లకే నరకయాతన చూస్తున్నాడు ఒడిశాలోని ఓ చిన్నారి. కనీసం ఏ వ్యాధి సోకిందో కూడా తెలియని దుస్థితి.. ప్రైవేట్​ ఆసుపత్రిలో వైద్యం చేయిద్దామంటే కన్నవారిని పేదరికం వెక్కిరిస్తోంది. పూర్తిగా అప్పుల్లో కూరుకుపోయినా.. తనయుడిని కాపాడుకోవాలన్న తపన బరువెక్కిన గుండెల్లో ధ్వనిస్తోంది.

ఒళ్లంతా ముక్కలైనట్లుండే వింత వ్యాధితో ఆపసోపాలు పడుతున్నాడు ఒడిశా గుంజమ్​ జిల్లాకు చెందిన పదేళ్ల జగన్నాథ్​.

జగన్నాథ్​ తండ్రి ప్రభాకర్​ ప్రధాన్.. తల్లి సుష్మా. స్వస్థలం​ సెర్గఢ్​లోని గోఠాగావ్​లో ఇతరుల భూమిని కౌలుకు తీసుకుని సేద్యం చేస్తూ ​కుటుంబాన్ని పోషిస్తున్నారు​. ఈ దంపతులకు జగన్​ కన్నా ముందే నలుగురు కొడుకులు, ఒక కూతురు పుట్టి వింత వ్యాధి సోకి మరణించారు. ఆరో సంతానంగా జగన్నాథ్​ పుట్టాడు. ఏమైందో తెలియదు, జగన్​ కూడా అదే మహమ్మారి వ్యాధితో జన్మించాడు.

ఇప్పుడు జగన్నాథ్​కు 10 ఏళ్లు.. పుట్టినప్పటి నుంచి బెర్హంపుర్​ ఆసుపత్రిలో చికిత్స పొందుతున్నాడు. కానీ ఫలితం లేదు. ఇతర అధునాతన ఆసుపత్రుల్లో వైద్యం చేయిద్దామంటే చిల్లి గవ్వ లేకుండాపోయింది. ఇప్పటికే జగన్​ చికిత్స కోసం స్థోమతకు మించి రూ.7 లక్షలు అప్పు చేశాడు ప్రభాకర్​.

నరకయాతన..

శరీరమంతా పగుళ్లతో బీడువారిపోయింది.. భరించలేని మంట, దురదలతో నిత్యం బాధపడుతుంటాడు జగన్​. నొప్పి తీవ్రమైతే.. నీటి గోళంలో కూర్చుంటాడు. ఇక ఎండాకాలంలో జగన్​ పడే అవస్థలు వర్ణానాతీతం.

కడుపున పుట్టిన కొడుకు.. కళ్ల ముందే నొప్పితో తల్లడిల్లుతుంటే తల్లిదండ్రుల ప్రాణం తరక్కుమంటుంది. ఏళ్లుగా జగన్​ బాధను చూసి ఏడ్చి, ఏడ్చి ఇప్పుడు ఏడ్చేందుకు కన్నీళ్లు కూడా ఇంకిపోయాయి. కానీ, ఇప్పటికీ వారికి పరిష్కారం దొరకడంలేదు.

తల్లిదండ్రులే నేస్తాలు..

ఇదివరకు అందరి పిల్లల్లాగానే​ స్కూల్​కు వెళ్లేవాడు జగన్​. కానీ, శరీరంలో శక్తి లేక బల్ల మీద నుంచి పడిపోయేవాడు. ముడతలు పడే తన చర్మాన్ని చూసి మిగతా పిల్లలంతా భయపడేవారు. జగన్​ వ్యాధి తమకు సోకుతుందేమోనని కొంతమంది పారిపోయేవారు. అందుకే పాఠశాలకు వెళ్లడమే మానేశాడు జగన్​.

తన బాహ్య సౌందర్యం ఎలా ఉన్నా.. నిరంతరం తన కోసమే తపించే అమ్మ నాన్నలే తనకు నేస్తాలయ్యారు. ఏ స్నేహితులూ భర్తీ చేయలేని స్థానం తల్లిదండ్రులదేనని గ్రహించాడు జగన్​. అందుకే ఎక్కడికి వెళ్లినా అమ్మ వేలు పట్టుకుని చకచకా నడిచేస్తాడు. తన బాధను తండ్రితోనే పంచుకుంటాడు.

ప్రభుత్వం స్పందించాలి!

పదేళ్లుగా కష్టాలు పడుతున్నా.. ప్రభుత్వ ఆరోగ్య పథకాలేవి ఆ కుటుంబానికి అందట్లేదు. ప్రభుత్వ పథకాలు వర్తించాలంటే వికలాంగ ధ్రువీకరణ పత్రం కావాలన్నారు. అందుకోసం జగన్​ను వెంటబెట్టుకుని కార్యాలయాల చుట్టూ తిరిగి అధికారులకు విన్నవించుకున్నా లాభం లేకుండా పోయింది. ఆఖరికి జిల్లా కలెక్టర్​ను ఆశ్రయించినా ఫలితం దక్కలేదు.

ప్రభుత్వం స్పందించి ఆధునిక వైద్యం అందిస్తే తన కొడుకు ప్రాణాలు నిలుస్తాయని ఆశిస్తున్నారు ఈ తల్లిదండ్రులు.

ఇదీ చదవండి:కదులుతున్న రైల్లో ఇలా ఎక్కి.. అలా పర్స్​ కొట్టేశాడు!