బంగాల్ సీఎం మమతా బెనర్జీ ఈ నెల 10న నందిగ్రామ్లో నామినేషన్ వేసే రోజు గాయపడ్డ కేసును సీఐడీ దర్యాప్తు చేయనుందని సీనియర్ అధికారి ఒకరు తెలిపారు. సీఐడీ బృందం త్వరలో పూర్వ మేదినిపుర్ జిల్లాలో సంఘటన స్థలాన్ని సందర్శించి సాక్షుల వాంగ్మూలాన్ని నమోదు చేయనున్నట్లు సదరు అధికారి చెప్పారు. ఈ ఘటనపై టీఎంసీ నాయకుడు షేక్ సూఫియాన్ ఫిర్యాదుపై నందిగ్రామ్ పోలీస్ స్టేషన్లో కేసు నమోదైంది.
ఇప్పటికే గుర్తు తెలియని వ్యక్తులపై ఐపీసీ సెక్షన్ 341, సెక్షన్ 323 కింద కేసు నమోదు చేసినట్లు అధికారులు తెలిపారు. నామినేషన్ రోజు బీరులియా బజార్ ప్రాంతంలో మమత ఎడమ కాలికి గాయమైంది.
ఈ ఘటన అనంతరం చర్యలు చేపట్టిన ఎన్నికల సంఘం.. పూర్వ మేదినిపుర్ ఎస్పీ ప్రవీణ్ ప్రకాశ్ను సస్పెండ్ చేసింది. భద్రతలో లోపాలను ఎత్తిచూపుతూ.. జిల్లా మేజిస్ట్రేట్ విభూ గోయెల్ను బదిలీ చేసింది. సెక్యూరిటీ డైరక్టర్ వివేక్ సహాయ్ను ఆ బాధ్యతల నుంచి తొలగించింది.
గాయపడిన మమతా వీల్‌ఛైర్‌పైనే ఎన్నికల ప్రచారంలో పాల్గొంటున్నారు. అయితే ప్రతిపక్షాలు మాత్రం సానుభూతి పొందేందుకు దీదీ చేస్తున్న కుట్రగా ఆరోపిస్తున్నాయి.
ఇదీ చదవండి: 'మమతపై దాడి' సీసీటీవీ ఫుటేజ్ విడుదల!
