వారం రోజుల్లోనే భారత్లో వ్యాక్సినేషన్ ప్రక్రియ ప్రారంభం కానున్నట్లు కేంద్ర ఆరోగ్య మంత్రిత్వ శాఖ వెల్లడించింది. అత్యవసర అనుమతులు పొందిన 10 రోజుల్లోపే టీకాను తీసుకొస్తామని స్పష్టం చేసింది. అయితే తుది నిర్ణయం మాత్రం ప్రభుత్వానిదే అని.. కేంద్ర ఆరోగ్య శాఖ కార్యదర్శి రాజేష్ భూషణ్ తెలిపారు.
ఈ నెల 3నే కొవాగ్జిన్, కొవిషీల్డ్ టీకాల అత్యవసర వినియోగానికి భారత ఔషధ నియంత్రణ సంస్థ(డీసీజీఐ) అనుమతులు ఇచ్చిన నేపథ్యంలో.. జనవరి 13న వ్యాక్సినేషన్ ప్రారంభం కానున్నట్లు తెలుస్తోంది.
ఇదీ చూడండి: 'కొవాగ్జిన్, కొవిషీల్డ్ 100 శాతం సురక్షితం'
వ్యాక్సిన్ డ్రై- రన్ ఫీడ్బ్యాక్ ఆధారంగా టీకా పంపిణీ చేపట్టనున్నట్లు ఆరోగ్య శాఖ అధికారులు పేర్కొన్నారు. దేశంలో కర్నాల్, ముంబయి, చెన్నై, కోల్కతాలోని 4 ప్రధాన కేంద్రాల్లో వ్యాక్సిన్ల నిల్వకు ఏర్పాట్లు చేసినట్లు వివరించారు. దేశవ్యాప్తంగా మొత్తం 37 వ్యాక్సిన్ చిన్న నిల్వ కేంద్రాలు ఉన్నాయని తెలిపారు.
వారికి అవసరం లేదు..
టీకా కోసం కరోనా వారియర్లు తమ పేర్లను కో-విన్ యాప్లో నమోదు చేసుకోవాల్సిన అవసరం లేదని స్పష్టం చేశారు అధికారులు. ఆరోగ్య సేవల సిబ్బంది జాబితా తమ వద్ద ఉందని, దాని ప్రకారమే వ్యాక్సినేషన్ జరుగుతుందని వెల్లడించారు.
భారత్ బయోటెక్ రూపొందించిన కొవాగ్జిన్ టీకా, ఆక్స్ఫర్డ్-ఆస్ట్రాజెనెకా సౌజన్యంతో సీరం సంస్థ ఉత్పత్తి చేస్తున్న కొవిషీల్డ్ టీకాల అత్యవసర వినియోగానికి జనవరి 3న అనుమతులు ఇచ్చింది డీసీజీఐ.
ఇదీ చూడండి: టీకా అనుమతులు వచ్చేశాయ్.. పంపిణీ ఎలా?
