Bandi Sanjay: 'BRS..YSRCP ఒకే నాణానికి ఉన్న బొమ్మాబొరుసు'

Bandi Sanjay Comments on BRS and YSRCP: వైఎస్​ఆర్​సీపీ, బీఆర్‌ఎస్‌ పార్టీలపై బండి సంజయ్‌ తనదైన శైలిలో విమర్శలు గుప్పించారు. ఈ రెండు పార్టీలు ఒకే నాణానికి ఉన్న బొమ్మాబొరుసులాంటివని దుయ్యబట్టారు. పరస్పర స్వార్థ ప్రయోజనాల కోసం సాయం చేసుకుంటున్నారని ఆయన ఆరోపించారు.

Bandi Sanjay Comments on BRS and YSRCP: బీఆర్ఎస్‌.. వైఎస్​​ఆర్​సీపీ ఒకే నాణానికి ఉన్న బొమ్మాబొరుసు లాంటివని బీజేపీ రాష్ట్ర అధ్యక్షుడు బండి సంజయ్‌ ఆరోపించారు. స్వార్థ ప్రయోజనాల కోసం పరస్పరం సాయం చేసుకుంటున్నారని విమర్శించారు. రెండు రాష్ట్రాల్లో సెంటిమెంట్‌ రగిల్చేందుకు ప్రయత్నిస్తున్నారని దుయ్యబట్టారు. అందుకే ఒకరిపై ఒకరు విమర్శలు చేస్తూ.. ప్రజల్ని తప్పుదోవ పట్టించేందుకు కుట్రలు చేస్తున్నారని మండిపడ్డారు. విశాఖ ఉక్కు కర్మాగారం కొనేంత డబ్బు రాష్ట్ర ప్రభుత్వం వద్ద ఉంటే... బయ్యారంలో స్టీల్‌ ఫ్యాక్టరీ పెట్టొచ్చు కదా అని తెలంగాణ ప్రభుత్వాన్ని ప్రశ్నించారు. నిజాం చక్కెర కర్మాగారాన్ని తెరిపించి.. రైతులకు న్యాయం చేయొచ్చని రాష్ట్ర ప్రభుత్వాన్ని బండి సంజయ్‌ నిలదీశారు.

"వైసీపీ, బీఆర్ఎస్‌ ఒకే నాణానికి ఉన్న బొమ్మాబొరుసులాంటివి. పరస్పర స్వార్థ ప్రయోజనాల కోసం సాయం చేసుకుంటున్నారు. బీఆర్ఎస్‌, వైఎస్​ఆర్​సీపీ.. రెండు చోట్లా సెంటిమెంట్ రగిలిస్తున్నాయి. స్వార్థం కోసం విద్వేషాలు రెచ్చగొడుతున్నారు. విశాఖ స్టీల్‌ ఫ్యాక్టరీ కొనేంత డబ్బుంటే బయ్యారంలో ఫ్యాక్టరీ పెట్టొచ్చు కదా. నిజాం షుగర్స్ తెరవొచ్చు కదా." - బండి సంజయ్, బీజేపీ రాష్ట్ర అధ్యక్షుడు

కర్ణాటక ఎన్నికల ప్రచారంలో రాష్ట్ర బీజేపీ నేతలు: మరోవైపు కర్ణాటక ఎన్నికల ప్రచారానికి బీజేపీ జాతీయ నాయకత్వం.. తెలంగాణ బీజేపీ నాయకులను ఎంపిక చేసింది. మొత్తం 13 రాష్ట్రాల నుంచి కర్ణాటక ఎన్నికల ప్రచారానికి నేతలను ఎంపిక చేయగా.. ఇరవై అసెంబ్లీ నియోజకవర్గాలకు ఇంఛార్జీలుగా తెలంగాణ నేతలను నియమించింది. ఇప్పటికే తమకు అప్పగించిన నియోజకవర్గాలకు లక్ష్మణ్‌, అర్వింద్‌, జితేందర్‌రెడ్డి, వివేక్ వెంకట స్వామి, రఘునందన్‌రావు, కోమటిరెడ్డి రాజగోపాల్‌రెడ్డి, ఇంద్రాసేనారెడ్డి, గరికపాటి, బండ కార్తీకరెడ్డి, కొల్లి మాధవి, ఎస్‌.కుమార్ ప్రచారపర్వంలో పాల్గొంటున్నారు. లక్ష్మణ్‌తో పాటు మరికొందరికి నియోజకవర్గంతో పాటు ఆ జిల్లాలో ఉన్న మరో 5 నియోజక వర్గాల సమన్వయ బాధ్యతలు అప్పగించింది. 224 నియోజకవర్గాలకు 224 మందిని ఇతర రాష్ట్రాల నుంచి ఇంఛార్జీలను నియమించింది.

కొద్దిరోజుల నుంచి తెలుగు రాష్ట్రాల్లో విశాఖ స్టీల్‌ప్లాంట్ అంశం చర్చనీయాంశంగా మారింది. ఈ క్రమంలోనే ముఖ్యమంత్రి కేసీఆర్ ఆదేశాల మేరకు సింగరేణి బృందం విశాఖ ఉక్కు పరిశ్రమను సందర్శించింది. విశాఖ ఉక్కు కర్మాగార నిర్వహణ మూలధనం కోసం ఇచ్చిన ఆసక్తి వ్యక్తీకరణలో పాల్గొననున్నట్లు తెలిపింది. ఈ క్రమంలోనే విశాఖ ఉక్కు పరిశ్రమ ప్రైవేటీకరణ అంశాన్ని తాత్కాలికంగా వెనక్కి తీసుకుంటున్నట్లు కేంద్రం పేర్కొంది.

ఇవీ చదవండి: ఇప్పటికిప్పుడు విశాఖ స్టీల్‌ప్లాంట్ ప్రైవేట్‌పరం చేయాలనుకోవట్లేదు: కేంద్రమంత్రి ఫగ్గన్‌