బంగాల్​లో సాధువులపై మూకదాడి- దీదీ సర్కారుపై మండిపడ్డ బీజేపీ

Attack On Sadhus In West Bengal : బంగాల్​లో సాధువులపై జరిగిన మూకదాడిపై బీజేపీ భగ్గుమంది. ప్రభుత్వ మద్దతుతోనే ఇలాంటి దారుణాలు జరుగుతున్నాయని మండిపడింది. బంగాల్​లో హిందువుగా ఉండటం నేరమా? అని ప్రశ్నించింది.

Attack On Sadhus In West Bengal : బంగాల్​లో సాధువులపై మూకదాడి జరిగిన ఘటన రాజకీయ ఉద్రిక్తతకు దారి తీసింది. ఘటనపై విచారం వ్యక్తం చేసిన బీజేపీ, అధికార మమతా బెనర్జీ ప్రభుత్వంపై విమర్శలు గుప్పించింది. టీఎంసీ మద్దతుతోనే ఇలాంటి దుర్మార్గాలు జరుగుతున్నాయని ఆరోపించింది.

అసలేమైందంటే?
ఉత్తర్‌ప్రదేశ్‌కు చెందిన ముగ్గురు సాధువులు సంక్రాంతిని పురస్కరించుకుని బంగాల్‌లోని గంగాసాగర్‌ మేళాకు బయల్దేరారు. గురువారం పురులియా జిల్లాలో వాహనం ఆపి ఇద్దరు యువతులను గంగాసాగర్‌కు దారి అడిగారు. సాధువులను చూడగానే భయపడ్డ యువతులు గట్టిగా కేకలు పెట్టారు. ఇది గమనించిన స్థానికులు వారిని కిడ్నాపర్లుగా భావించి విచక్షణా రహితంగా దాడిచేశారు. పోలీసులు అక్కడకు చేరుకుని పరిస్థితిని అదుపుచేశారు. సాధువులను పోలీసు స్టేషన్‌కు తీసుకెళ్లి విచారించి కిడ్నాపర్లు కాదని నిర్ధరించారు. దాడికి పాల్పడిన 12 మందిని అరెస్టు చేశారు.

'బుజ్జగింపు రాజకీయాల వల్లే'
ఈ ఘటనపై కేంద్ర మంత్రి అనురాగ్ ఠాకూర్ తీవ్రంగా స్పందించారు. బుజ్జగింపు రాజకీయలే ఇలాంటి వాతావరణాన్ని సృష్టించాయని టీఎంసీ సర్కారు లక్ష్యంగా విమర్శలు గుప్పించారు. 'బంగాల్​లోనే ఇంత హిందూ వ్యతిరేకత ఎందుకు? 2020లో రామజన్మ భూమి ఆలయానికి శంకుస్థాపన సమయంలో బంగాల్​లో కర్ఫ్యూ లాంటి పరిస్థితి సృష్టించారు. తద్వారా హిందువులు ఆ కార్యక్రమాన్ని జరుపుకోకుండా అడ్డుకున్నారు. ఇప్పుడు సాధువులను కొట్టి హత్య చేసేందుకు ప్రయత్నించారు. ఈ ఘటనపై రాష్ట్ర ప్రభుత్వం మౌనంగా ఉంది. మమతా బెనర్జీ పాలనలో రాష్ట్రంలో శాంతిభద్రతలు కుప్పకూలాయి' అని అనురాగ్ ఠాకూర్ ఆరోపించారు.

'ఇది పాల్ఘర్-2'
సాధువులపై దాడి ఘటనపై బీజేపీ అధికార ప్రతినిధి షెహజాద్​ పునావాలా స్పందించారు. కొన్నాళ్ల క్రితం ఉద్ధవ్ ఠాక్రే హయాంలో మహారాష్ట్రలోని పాల్ఘర్​లో జరిగిన సాధువులపై దాడి, ఈ బంగాల్​ ఘటన ఒకే విధంగా ఉన్నాయని ఆరోపించారు. ఇప్పుడు మమతా బెనర్జీ ప్రభుత్వంలో 'పాల్ఘర్​-2' జరుగుతోందని ఘాటు విమర్శలు చేశారు. 'బంగాల్​లో హిందువుగా ఉండటం నేరమా?' అని ప్రశ్నించారు.

బీజేపీకి కౌంటర్
మరోవైపు, సాధువులపై దాడిని ఖండించిన టీఎంసీ- బీజేపీ చేసిన ఆరోపణలను తిప్పికొట్టింది. వారి ఆరోపణలు సత్య దూరం అని తోసిపుచ్చింది. బీజేపీ నేతలు కావాలనే ఈ ఘటనకు మతం రంగు పులుముతున్నారని ఆగ్రహం వ్యక్తం చేసింది. బంగాల్​లో శాంతిభద్రతల గురించి మాట్లాడే ముందు బీజేపీ పాలిత రాష్ట్రాల్లో లా అండ్ ఆర్డర్ పరిస్థితి సరిచూసుకోవాలని హితవు పలికింది.