అసోంలో 'మహాబాహు-బ్రహ్మపుత్ర' ప్రాజెక్టును గురువారం వీడియోకాన్ఫరెన్స్ ద్వారా ప్రారంభించనున్నారు ప్రధానమంత్రి నరేంద్ర మోదీ. దాంతో పాటు ధుబ్రి-ఫుల్బారి వంతెన నిర్మాణానికి శంకుస్థాపన చేయనున్నారు. అలాగే.. మజులి వంతెన నిర్మాణంలో భాగంగా నిర్వహిస్తోన్న ప్రత్యేక కార్యక్రమంలో పాల్గొననున్నారు.
నామటి-మజులి ద్వీపాలు, ఉత్తర గువాహటి-దక్షిణ గువాహటి, ధుబ్రి-హాట్సింగిమారి శిలాన్యాస్ల మధ్య (రో-పాక్స్) ప్రయాణికుల రవాణా నౌక కార్యకలాపాలను ప్రారంభించటం ద్వారా ఈ మహాబాహు-బ్రహ్మపుత్ర ప్రారంభమవుతుందని ప్రధానమంత్రి కార్యాలయం తెలిపింది. వాటితో పాటు.. సులభతర వాణిజ్యంలో డిజిటల్ సొల్యూషన్స్ను కూడా ప్రారంభించనున్నట్లు వెల్లడించింది. నాలుగు ప్రాంతాల్లో రూ.9.41 కోట్లతో నీమటి, బిస్వనాథ్ ఘాట్, పండు, జోగిఘోపాలను పర్యటక ప్రాంతాలుగా అభివృద్ధి చేయనున్నారు.
మహాబాహు-బ్రహ్మపుత్ర అంటే?
ఈశాన్య భారత్లోని ప్రాంతాలకు రవాణా సౌకర్యం కల్పించటం ఈ మహాబాహు-బ్రహ్మపుత్ర ప్రాధాన లక్ష్యం. అందులోనే బ్రహ్మపుత్ర, బరాక్ నదీ పరివాహక ప్రాంతాల ప్రజల జీవన విధానాలు మెరుగుపరిచేందుకు పలు అభివృద్ధి కార్యక్రమాలు చేపట్టనున్నారు. రో-పాక్స్ సేవల ద్వారా నదుల మధ్య అనుసంధాన సమయం తగ్గుతుంది. దీని వల్ల రోడ్డు ద్వారా వెళ్లే సమయమూ కలిసొస్తుంది. నీమటి-మజులి మధ్య సుమారు 420 కిలోమీటర్ల దూరం తగ్గుతుంది. ప్రస్తుతం ఈ వ్యవస్థ ద్వారా 12 కిలోమీటర్లు మాత్రమే ప్రయాణిస్తున్నారు. ఇది చిన్న తరహా పరిశ్రమల సరకు రవాణాకు చాలా ఉపయోగకరంగా ఉండనుంది.
ఇదీ చూడండి: బంపర్ ఆఫర్: థియేటర్లో ఒక టికెట్ కొంటే ఇంకోటి ఫ్రీ!
