సుప్రీం న్యాయవ్యవస్థపై అనుచిత వ్యాఖ్యలు చేశారన్న ఆరోపణలతో మాజీ సీజేఐ, రాజ్యసభ సభ్యుడు జస్టిస్ రంజన్ గొగొయిపై ధిక్కార చర్యలు చేపట్టాలన్న వాదనలను తోసిపుచ్చారు అటార్నీ జనరల్ కేకే వేణుగోపాల్. ఆయన మాటలు న్యాయవ్యవస్థలో లోపాలను ప్రతిబింబిస్తున్నాయని స్పష్టం చేశారు.
న్యాయవ్యవస్థ దీన స్థితిలో ఉందని, సరైన సమయంలో న్యాయం జరిగే పరిస్థితి లేదని ఓ కార్యక్రమంలో మాజీ సీజేఐ పేర్కొన్నారు. దీనిపై నేర ధిక్కార చర్యలు చేపట్టేందుకు అనుమతించాలని అటార్నీ జనరల్ను కోరారు సామాజిక కార్యకర్త సాకెత్ గోఖలే. ఈ క్రమంలో చర్యలు చేపట్టేందుకు నిరాకరిస్తూ గోఖలేకు లేఖ రాశారు వేణుగోపాల్.
" ఇంటర్వ్యూ మొత్తాన్ని చూశా. ఆయన మాట్లాడింది న్యాయవ్యవస్థ మంచి కోసమేనని తెలుస్తోంది. ఏ విధంగానైనా కోర్టును అపకీర్తి చేయదు. చట్టం దృష్టిలో దాని అధికారాన్ని తగ్గించదు. న్యాయవ్యవస్థలోని లోపాలను మాజీ సీజేఐ మాటలు ప్రతిబింబిస్తున్నాయి. "
- కేకే వేణుగోపాల్, అటార్నీ జనరల్
కోర్టు ధిక్కరణ చట్టం, నిబంధనల ప్రకారం వ్యక్తులపై క్రిమినల్ ధిక్కార కేసు వేసేందుకు అటార్నీ జనరల్ లేదా సొలిసిటర్ జనరల్ సమ్మతి కావాలి.
ఇదీ చూడండి: రాజ్యసభ సభ్యునిగా జస్టిస్ గొగొయి ప్రమాణం
