12 Villagers are Voting for Fourth Time in a Year : ఎవరైనా ఒక వ్యక్తి ఎన్ని ఓట్లు వేయొచ్చంటే ఠక్కున ఒక ఓటు అని సమాధానం చెప్తాం. కానీ ఈ ప్రాంతంలో మాత్రం ఒక్కో వ్యక్తి ఒకే ఏడాదిలో నాలుగుసార్లు ఓటేస్తున్నారు. అదేంటని ఆశ్చర్యపోతున్నారా? అసలు ఆ ప్రాంతం ఎక్కడ ఉందని అనుకుంటున్నారా? ఇంతకీ వారు నాలుగు ఓట్లను ఎలా వేస్తున్నారో తెలుసా?
తెలంగాణ రాష్ట్రంలోని కుమురం భీం జిల్లా కెరమెరి మండంలోని 12 గ్రామాల పౌరులు నాలుగు ఓట్లను వేస్తారు. ఈ గ్రామాల ప్రజలకు తెలంగాణతో పాటు మహారాష్ట్రలోనూ ఓటు వేసే అరుదైన అవకాశం ఉంది. బోలాపటార్, కోట, పద్మావతి, పరందోలి, ముకదమ్గూడ, అంతాపూర్, మహరాజ్గూడ, శంకర్లొద్ది, ఇంద్రానగర్, గౌరి, లెండిగూడ, ఎస్సాపూర్ గ్రామాల్లో రెండు రాష్ట్రాల పాలన సాగుతోంది. ఇక్కడ వార్డు సభ్యుల నుంచి ముఖ్యమంత్రి వరకూ అంతా ఇద్దరేసి ప్రజాప్రతినిధులు ఉంటారు.
వీరు గతేడాది నవంబరు 30న జరిగిన తెలంగాణ అసెంబ్లీ ఎన్నికల్లో ఆసిఫాబాద్ నియోజకవర్గానికి ఓట్లేయగా, ఈ ఏడాది లోక్సభ ఎన్నికల్లో ఏప్రిల్ 19న మహారాష్ట్రలోని చంద్రపూర్ ఎంపీ స్థానానికి ఓటేశారు. అలాగే మే 13న తెలంగాణలోని ఆదిలాబాద్ ఎంపీ స్థానానికి ఓట్లేశారు. మళ్లీ ఈ నెల 20న జరగనున్న మహారాష్ట్ర అసెంబ్లీ ఎన్నికల్లో రాజూరా నియోజకవర్గానికి ఓట్లు వేయనున్నారు.
సుప్రీంలో పెండింగ్లో కేసు : ఈ 12 గ్రామాలు 1956లో రాష్ట్రాల పునర్విభజనలో ఉమ్మడి ఆంధ్రప్రదేశ్లోకి వచ్చాయి. కానీ 1987లో భౌగోళికంగా, సాంస్కృతికంగా తమకు దగ్గరగా ఉన్నాయంటూ మహారాష్ట్ర వీటిని చంద్రపూర్ జిల్లా జివితి తాలూకాలో చేర్చింది. ఈ గ్రామాల సమస్యను పరిష్కరించడానికి ఇరు రాష్ట్రాలు కేకే నాయుడు కమిషన్ను ఏర్పాటు చేశాయి. ఈ కమిషన్తో పాటు ఏపీ ఉమ్మడి హైకోర్టు కూడా ఈ గ్రామాలన్నీ ఉమ్మడి ఏపీవేనని తేల్చి చెప్పాయి. ఈ విషయంపై మహారాష్ట్ర.. సుప్రీంకోర్టులో సవాల్ చేసింది. అప్పటి నుంచి కేసు పెండింగ్లో ఉంది. ఇక్కడి ప్రజలు మాత్రం ఇరు రాష్ట్రాల్లో తమ ఓటు హక్కును వినియోగించుకుంటున్నారు.
జనవరి 1 నాటికి 18 ఏళ్లు నిండిన వారు ఓటు నమోదు చేసుకోవాలి: ప్రధాన ఎన్నికల అధికారి
