ఛత్తీస్గఢ్ జశ్పుర్లో దారుణ ఘటన జరిగింది. పతాలగావ్లో దుర్గామాత విగ్రహ నిమజ్జనానికి వెళుతుండగా.. ఓ బృందంలోని 20మందిపైకి ఓ కారు వేగంగా దూసుకెళ్లింది. ఘటన నుంచి తేరుకున్న అనంతరం స్థానికులు క్షతగాత్రులను ఆసుపత్రికి తరలించారు. ఈ ఘటనలో నలుగురు ప్రాణాలు కోల్పోయారు. మరికొందరు గాయపడ్డారు. వీరిలో పలువురు పరిస్థితి విషమంగా ఉన్నట్టు సమాచారం.
ఘటన అనంతరం కారును స్థానికులు వెంబడించారు. కొద్దిసేపటి అనంతరం ఊరి చివర.. కారు మంటల్లో కాలుతూ కనపడింది. వాహనంలో భారీ మొత్తంలో గంజాయి రవాణా చేస్తున్నారని, అందుకే వారే కారుకు నిప్పంటించారని స్థానికులు ఆరోపించారు.
ఘటనపై సమాచారం అందిన వెంటనే పోలీసులు స్పందించారు. ఇద్దరిని అరెస్టు చేశారు. వారు మధ్యప్రదేశ్కు చెందిన బబ్లు విశ్వకర్మ, శిశుపాల్ సాహులుగా గుర్తించారు.
స్థానికుల ఆగ్రహం..
కారు దూసుకెళ్లిన ఘటన అనంతరం ప్రజలు తీవ్రస్థాయిలో ఆగ్రహం వ్యక్తం చేశారు. పతాల్గావ్ పోలీస్ స్టేషన్ ఎదుట బైటాయించారు. నిరసన చేపట్టారు. ఈ దృశ్యాలను చిత్రీకరిస్తున్న ఓ పోలీసును నిరసనకారులు కొట్టినట్టు తెలుస్తోంది. మీడియా ప్రతినిధులపైనా దాడి చేసినట్టు సమాచారం.
'హృదయవిదారకం...'
ఘటనపై ఛత్తీస్గఢ్ సీఎం భూపేశ్ భఘేల్ స్పందించారు. ఘటన హృదయవిదారకమన్నారు.
"జశ్పుర్ ఘటన హృదయవిదారకం. నిందితులను వెంటనే పట్టుకున్నారు. ఓ పోలీసు అధికారిపై చర్యలు చేపట్టారు. దర్యాప్తు ముమ్మరం చేశాము. ఎవరినీ విడిచిపెట్టము. అందరికీ న్యాయం జరుగుతుంది.
--- భూపేశ్ భఘేల్, ఛత్తీస్గఢ్ సీఎం.
ఘటనపై భాజపా నేత, మాజీ ముఖ్యమంత్రి రమణ్ సింగ్ స్పందించారు.
"ఇది ఎంతో బాధాకరమైన వీడియో. ఛత్తీస్గఢ్లో డ్రగ్ మాఫీయా ఎవరికీ భయపడటం లేదు. మతపరమైన ఊరేగింపుల చేసే వారిని ఈ విధంగా అణచివేస్తారా? జశ్పుర్ ఎస్పీని తక్షణమే తొలగించాలి. మృతుల కుటుంబాలకు రూ. 50లక్షల పరిహారాన్ని ఇవ్వాలి. క్షతగాత్రుల చికిత్సకు అన్ని ఏర్పాట్లు చేయాలి."
--- రమణ్ సింగ్, మాజీ సీఎం.
ఇదీ చూడండి:- పండగపూట విషాదం.. ట్రాక్టర్ బోల్తాపడి 11మంది మృతి
