మిజోరం లుంగలేయీ జిల్లాలోని ఓ గ్రామంలో పందుల మరణాలు ఆందోళన కలిగిస్తున్నాయి. బంగ్లాదేశ్ సరిహద్దుకు సమీపంలోని లుంగసెన్ గ్రామంలో రెండు వారాల్లోనే 87 పందులు మృతి చెందాయి. దీంతో రూ.40 లక్షల నష్టం వాటిల్లున్నట్లు అధికారులు తెలిపారు. అయితే ఈ మరణాలకు కారణామేంటన్నది ఇంకా తెలియలేదు. ఆఫ్రికన్ స్వైన్ ఫ్లూ (ఏఎస్ఎఫ్)తోనే పందులు చనిపోయినట్లు అధికారులు అనుమానిస్తున్నారు. ఏఎస్ఎఫ్ అనుమానంతో ఆందోళన చెందుతున్నారు అక్కడి ప్రజలు.
మార్చి 21న తొలి మరణం నమోదైందని అధికారులు వెల్లడించారు. ఎలిసా, పీసీఆర్ పరీక్షలు నిర్వహించగా.. క్లాసికల్ స్వైన్ ఫ్లూ, పోర్సైన్ రీ ప్రొడక్టివ్ అండ్ రెస్పిరేటరీ సిండ్రోమ్ వ్యాధులు లేవని వైద్యులు నిర్ధరించారు. మధ్యప్రదేశ్‌లోని నేషనల్ ఇనిస్టిట్యూట్ ఆఫ్ హై సెక్యూరిటీ యానిమల్ డిసీజెస్ (ఎన్‌ఐహెచ్‌ఎస్‌ఏడీ)లో ఏఎస్ఎఫ్ నిర్ధరణ పరీక్షలు చేపట్టాల్సి ఉందని పశువైద్య నిపుణులు లాల్‌మింగ్‌తంగా తెలిపారు. వెటర్నరీ సైన్స్ అండ్ యానిమల్ హస్బెండరీ కళాశాలలో ప్రాథమిక పరీక్ష నిర్వహించనున్నట్లు ఆయన పేర్కొన్నారు.
రాష్ట్రంలో ఏఎస్ఎఫ్పై అధికారులు హెచ్చరికలు జారీ చేశారు. ఏప్రిల్ 2న 144 సెక్షన్ విధించారు. లుంగ్సెన్ గ్రామాన్ని వ్యాధి కారక ప్రాంతంగా ప్రకటించారు.
ఇదీ చూడండి: సీడీ కేసులో ట్విస్ట్- మాజీ మంత్రికి నోటీసులు
