Civil Services: 2021 సివిల్ సర్వీసెస్ పరీక్షల్లో మహిళా అభ్యర్థులు సత్తాచాటారు. టాప్ 3 ర్యాంకులు వారికే దక్కాయి. శృతి శర్మ, అంకితా అగర్వాల్, గామిని సింగ్లా.. వరుసగా తొలి మూడు స్థానాల్లో నిలిచారు. ఈ మేరకు ఫలితాలను సోమవారం విడుదల చేసింది యూనియన్ పబ్లిక్ సర్వీస్ కమిషన్ (యూపీఎస్సీ). మొత్తంగా 685 మంది అభ్యర్థులు ఈ ప్రతిష్టాత్మక పరీక్షలో ఉత్తీర్ణులైనట్లు పేర్కొంది.
సివిల్స్ సాధించినవారిలో జనరల్ కేటగిరీకి చెందినవారు 244, ఈడబ్ల్యూఎస్ 73, ఓబీసీ 203, ఎస్సీలు 105, ఎస్టీలు 60 మంది ఉన్నట్లు కమిషన్ తెలిపింది. అఖిల భారత సర్వీసులైన ఐఏఎస్, ఐపీఎస్, ఐఎఫ్ఎస్ అధికారులను ఎంపిక చేసేందుకు ఏటా సివిల్ సర్వీసెస్ పరీక్షను నిర్వహిస్తుంది యూపీఎస్సీ. ప్రిలిమ్స్, మెయిన్స్, ఇంటర్వ్యూ.. మూడు దశల్లో అభ్యర్థుల ఎంపిక జరుగుతుంది. మెయిన్స్ పరీక్ష ఈ ఏడాది జనవరిలో జరగగా, ఇంటర్వ్యూలను ఏప్రిల్, మే నెలల్లో నిర్వహించారు. ఇక 80 మంది అభ్యర్థులను ప్రొవిజనల్గా ఎంపిక చేయగా, ఒకరి ఫలితాన్ని మాత్రం నిలిపివేశారు.
ప్రధాని అభినందనలు: సివిల్స్ సాధించిన అభ్యర్థులకు ప్రధానమంత్రి నరేంద్ర మోదీ శుభాకాంక్షలు తెలియజేశారు. "2021 సివిల్స్ ఉత్తీర్ణులకు అభినందనలు. అజాదీ కా అమృత్ మహోత్సవ్ వేళ భారత్ అభివృద్ధి పథంలో పయనిస్తున్న దశలో కీలకమైన బాధ్యతలు చేపట్టబోతున్నందుకు శుభాకాంక్షలు." అని మోదీ పేర్కొన్నారు.
ఇదీ చూడండి: 'పీఎం కేర్స్ ఫర్ చిల్డ్రన్' పథకానికి మోదీ శ్రీకారం
