దేశంలో ఈ ఏడాది మొత్తం ఐదు తుపాన్లు రాగా, అందులో నాలుగు తీవ్రంగా మారాయని భారత వాతావరణ శాఖ(ఐఎండీ) తెలిపింది. గత నెలలోనే మూడు తుపాన్లు వరుసగా వచ్చి తీవ్ర నష్టం కలిగించాయని ఐఎండీ డైరెక్టర్ జనరల్ మృత్యుంజయ్ మహాపాత్ర చెప్పారు. తొలుత మే 19న బంగాల్-బంగ్లాదేశ్ తీరం మీదుగా దేశంలోకి ప్రవేశించిన 'అంపన్' తుపాను బీభత్సం సృష్టించింది. ఆ తర్వాత అరేజియాలో ఉద్భవించిన 'నిసర్గ' తుఫాన్ ముంబయిని వణికించింది.
నవంబరులో అరేబియాలో వచ్చిన 'గతి' తుఫాన్ కేరళలో కుంభవృష్టి కురిపించింది. ఇదే నెలలో బంగాళాఖాత తీరంలో పుట్టిన 'నివర్' తుపాను తమిళనాడు తీరంలోనే కల్లోలం రేపింది. వారం వ్యవధిలోనే శ్రీలంక తీరం మీదుగా వచ్చిన 'బురేవి' తుఫాన్ దక్షిణ తమిళనాడును కుదిపేసింది. పైవాటన్నింట్లో అంపన్ తుపాను అత్యంత తీవ్రమైందని, ఈ సందర్భంగా సముద్ర జలాలు 10 మీటర్ల మేర భూభాగంలోకి చొచ్చుకొచ్చాయని మహాపాత్ర చెప్పారు. రానున్న వారం రోజుల్లో తుపాన్లు వచ్చే అవకాశం తక్కువేనని తెలిపారు.
