కేంద్రమంత్రి వీకే సింగ్ స్వగ్రామమైన భివానీ జిల్లా బపోరాలో గత రెండు వారాల్లో 30 మంది అనుమానాస్పద పరిస్థితుల్లో మృతిచెందారు. వీరిలో పలువురికి కరోనా లక్షణాలు కనిపించినా.. ముగ్గురికి మాత్రమే పాజిటివ్గా పరీక్షల్లో తేలినట్టు గ్రామ సర్పంచి నరేశ్కుమార్ ఆదివారం తెలిపారు. గ్రామస్థులు కొవిడ్ పరీక్షలు చేయించుకోనందున ఈ మరణాల వెనుక గల కారణాలు తెలియకుండా పోయాయన్నారు. మృతుల్లో చాలామంది వృద్ధులని తెలిపారు. 20వేల జనాభా ఉన్న ఈ గ్రామంలో అధికారులు ఇప్పుడు అంబులెన్సు ఏర్పాటు చేసి, హడావుడిగా అందరికీ కొవిడ్ పరీక్షలు చేస్తున్నారు.
చుట్టుపక్కల మరికొన్ని గ్రామాల్లోనూ పరిస్థితులు ఇలాగే ఉన్నాయి. గత నెల రోహ్తక్ జిల్లా టిటౌలి గ్రామంలో 21 మంది మృతిచెందారు. ఇందులో కరోనా మరణాలు నాలుగే అని అధికారులు లెక్క తేల్చారు. భివానీ జిల్లాలోని ముంఢాల్ ఖుర్ద్, ముంఢాల్ కలాన్ గ్రామాల్లో గత కొన్ని వారాల్లో 40 మంది మృతిచెందారు. గ్రామాల్లో కరోనా నివారణకు ప్రభుత్వం ఓ టాస్క్ఫోర్స్ను ఏర్పాటు చేయాలని హరియాణా మాజీ ముఖ్యమంత్రి భూపీందర్సింగ్ హుడా డిమాండ్ చేశారు.
ఇదీ చదవండి : కరోనాలో కొత్త లక్షణం.. 'కొవిడ్ టంగ్‌'
