corona student news: ఒడిశా రాయ్రంగ్పుర్ జిల్లాలో 26మంది విద్యార్థినులు కరోనా బారిన పడ్డారు. మయూర్‌భంజ్‌లోని ప్రభుత్వ రెసిడెన్షియల్‌ బాలికల పాఠశాలలో ఈ కేసులు నమోదైనట్లు అధికారులు తెలిపారు. 259 విద్యార్థులు, 20 మంది సిబ్బంది ఉన్న ఈ పాఠశాలలో పెద్దఎత్తున కేసులు బయటపడటంతో అధికారులు అప్రమత్తం అయ్యారు.
పాఠశాల వద్ద అంబులెన్స్‌ను అందుబాటులో ఉంచారు. అత్యవసర పరిస్థితే తలెత్తితే వెంటనే బాధితులను తరలించేందుకు అంబులెన్స్‌ ఉపయోగపడుతుందని అధికారులు తెలిపారు. పాఠశాలకు వస్తున్న బాలికలు స్వల్ప లక్షణాలతో బాధపడుతున్నట్లు ఉపాధ్యాయులు గమనించారు. బాధిత విద్యార్థులకు గత గురువారం కరోనా పరీక్షలు నిర్వహించగా 26మందికి కొవిడ్ నిర్ధరణ అయినట్లు తాజా నివేదికల్లో వెల్లడైంది. ప్రస్తుతం బాధితులందరినీ పాఠశాల ప్రాంగణంలో ఉంచి వైద్యసేవలు అందిస్తున్నట్లు అధికారులు తెలిపారు.
కర్ణాటకలో..
కర్ణాటక ధార్వాడ్లోని ఎస్డీఎమ్ వైద్య కళాశాలలోనూ కొవిడ్-19 కలకలం సృష్టించింది. ఇప్పటివరకు వైరస్ బారిన పడిన విద్యార్థుల సంఖ్య 281కు చేరినట్లు ధార్వాడ్ జిల్లా కలెక్టర్ నితీశ్ పాటిల్ తెలిపారు. కొత్తగా 99 మందికి వైరస్ నిర్ధరణ కాగా.. ఇంకా 1,822 శాంపిల్స్ ఫలితాలు రావాల్సి ఉందన్నారు. కరోనా నిర్ధరణ అయిన 281 మందిలో కేవలం ఆరుగురిలో మాత్రమే కొవిడ్ లక్షణాలు కనిపించాయని, మిగతా వారికి ఎలాంటి లక్షణాలు లేవన్నారు. అయితే వీరందరూ పూర్తిగా టీకాలు వేసుకున్న వారేనని వివరించారు. విద్యార్థులందరినీ క్వారంటైన్కు తరలించి చికిత్స అందిస్తున్నామన్నారు.
ఫ్రెషర్స్ పార్టీతోనే..
కాలేజీలో నవంబరు 17న జరిగిన ఫ్రెషర్స్ పార్టీనే కరోనా విజృంభణకు కారణమని వైద్యాధికారి నితేశ్ కె. పాటిల్ ఇదివరకే స్పష్టం చేశారు. ఈ కార్యక్రమంలో విద్యార్థుల తల్లిదండ్రులు సైతం పాల్గొన్నారు. విద్యార్థుల శాంపిల్స్ను జీనోమ్ సీక్వెన్సింగ్ కోసం పంపించారు. ఇప్పటికే క్యాంపస్లోని రెండు హాస్టళ్లను శానిటైజ్ చేశారు అధికారులు.
