మనీలాండరింగ్ కేసులో ఆరోపణలు ఎదుర్కొంటున్న మహారాష్ట్ర మాజీ హోంమంత్రి అనిల్ దేశ్ముఖ్ (anil deshmukh news) గురించి సంచలన విషయాలు వెల్లడించారు మాజీ పోలీస్ అధికారి సచిన్ వాజే. అనిల్ దేశ్ముఖ్, రవాణా శాఖ మంత్రి అనిల్ పరాబ్.. 10 మంది పోలీస్ అధికారుల దగ్గర నుంచి రూ.40 కోట్ల లంచం తీసుకున్నారని తెలిపారు. ఈడీకి ఇచ్చిన వాంగ్మూలంలో వాజే (sachin vaze latest news) ఈమేరకు పేర్కొన్నారు.
"2020 జులైలో పరమ్ వీర్ సింగ్ 10 మంది డీసీపీలను బదిలీ చేస్తూ ఆదేశాలు జారీ చేశారు. ఈ నిర్ణయంపై దేశ్ముఖ్, పరాబ్ అసంతృప్తి వ్యక్తం చేశారు. ఈ ఆర్డర్స్ను రద్దు చేసేందుకు సంబంధిత అధికారుల నుంచి రూ.40 కోట్లు వసూలు చేశారని తెలిసింది. ఇద్దరికీ చెరో రూ. 20 కోట్లను అధికారులు సమర్పించుకున్నారు."
-సచిన్ వాజే, మాజీ పోలీస్ అధికారి
'బార్ల నుంచి డబ్బు తెమ్మనేవారు'
బార్లు, రెస్టారెంట్ల నుంచి దేశ్ముఖ్ తనను డబ్బు వసూలు చేయమనేవారని ఆరోపించారు వాజే. హై ప్రొఫైల్ కేసుల దర్యాప్తులో కూడా సూచనలు చేస్తూ ఉండేవారని పేర్కొన్నారు. గతేడాది అక్టోబరులో దేశ్ముఖ్.. 1,750 బార్లు, రెస్టారెంట్ల జాబితా ఇచ్చారని తెలిపారు. ఆ జాబితాలోని ప్రతి బార్, రెస్టారెంట్ నుంచి రూ.3 లక్షలు వసూలు చేయాలని ఆదేశించినట్లు వెల్లడించారు.
అనిల్ దేశ్ముఖ్ మాజీ కార్యదర్శి సంజీవ్ పలాండే, సహాయకుడు కుందన్ శిందేపై ధాఖలైన ఛార్జ్షీట్లో భాగంగా ఈడీ సచిన్ వాజే వాంగ్మూలాన్ని నమోదు చేసింది.
మనీలాండరింగ్ కేసులో సంజీవ్, శిందేది కీలక పాత్ర అని ఈడీ పేర్కొంది. వాజే ద్వారా అనిల్ దేశ్ముఖ్.. బార్లు, రెస్టారెంట్ల నుంచి వసూలు చేసేవారని తెలిపింది. ఈ క్రమంలో వాజేకు.. అనిల్ దేశ్ముఖ్ చేసే సూచనలను పలాండే చేరవేసేవారని పేర్కొంది. అదే విధంగా వాజే తెచ్చిన డబ్బును శిందే అందుకునేవారని వివరించింది. ఈ ఏడాది జనవరి, ఫిబ్రవరి నెలల్లో వాజే.. శిందేకు రూ.4.6 కోట్లు అందించారని తెలిపింది.
ఐటీ దాడులు..
పన్ను ఎగవేతకు సంబంధించి ఆదాయ పన్ను శాఖ శుక్రవారం.. ముంబయి, నాగ్పుర్, జైపుర్లోని దేశ్ముఖ్కు చెందిన కార్యాలయాల్లో సోదాలు నిర్వహించింది.
ఇదీ కేసు..
అనిల్ దేశ్ముఖ్ రూ. 100 కోట్లు లంచం తీసుకున్నారన్న ముంబయి మాజీ పోలీస్ కమిషనర్ పరమ్ వీర్ సింగ్ ఆరోపణల మేరకు ఈడీ, సీబీఐ దర్యాప్తు చేపట్టాయి. అయితే దీనిపై స్పందించిన అనిల్.. పరమ్ వీర్ సింగ్ను పదవిలో నుంచి తొలగించాకే ఆయన ఇటువంటి ఆరోపణలు చేస్తున్నారని పేర్కొన్నారు. అనంతరం ఆయన హోంమంత్రి పదవికి రాజీనామా చేశారు.
మరోవైపు సచిన్ వాజే.. దిగ్గజ వ్యాపారవేత్త ముకేశ్ అంబానీ ఇంటి వద్ద బాంబుల కేసులో నిందితుడిగా ఉన్నారు. ప్రస్తుతం ఈ కేసును ఎన్ఐఏ దర్యాప్తు చేస్తోంది.
ఇదీ చూడండి : 'సూపర్‌ కాప్‌' అవ్వాలని.. అంబానీ నుంచి డబ్బు లాగాలని..
