షర్మిల కాంగ్రెస్​లో చేరితే మాకేం నష్టం లేదు : వైవీ సుబ్బారెడ్డి

YV Subba Reddy Comments on Sharmila: వైఎస్​ఆర్​ తెలంగాణ పార్టీ అధ్యక్షురాలు షర్మిల కాంగ్రెస్​లో చేరుతున్నారనే ఆంశంపై, వైఎస్సార్​ కాంగ్రెస్​ నేత వైవీ సుబ్బారెడ్డి స్పందించారు. అంతేకాకుండా రాష్ట్రంలో హాట్​ టాపిక్​గా మారిన ఎమ్మెల్యే అభ్యర్థుల మార్పుపై కూడా ఆయన స్పందించారు. అన్ని అంశాలను దృష్టిలో ఉంచుకుని, విజయాన్ని సాధించడానికే తాము మార్పులు చేస్తున్నామని స్పష్టం చేశారు. రాబోయే రోజుల్లో ఉత్తరాంధ్రలో కూడా మార్పులు చేర్పులకు అవకాశం ఉందని ఆయన తెలిపారు.

షర్మిల కాంగ్రెస్​లో చేరితే తమకేం నష్టం లేదని వైఎస్సార్​సీపీ ఉత్తరాంధ్ర సమన్వయకర్త వైవీ సుబ్బారెడ్డి వ్యాఖ్యనించారు. విజయమ్మతో భేటీలో కుటుంబ విషయాలే చర్చిస్తున్నానని, రాయబారాలు చేయాల్సిన అవసరం లేదని ఆయన స్పష్టం చేశారు. జగన్​ను ప్రత్యక్షంగా ఎదుర్కొనే ధైర్యం లేకనే బురద జల్లుతున్నారని ఆగ్రహం వ్యక్తం చేశారు. ఎవరు ఎన్ని కుట్రలు చేసినా వైఎస్సార్​సీపీ గెలుపును ఆపలేరని అభిప్రాయం వ్యక్తం చేశారు. క్షేత్రస్థాయిలో అభ్యర్థులపై వ్యతిరేకత ఉన్న చోట, గెలుపు అవకాశాలు తక్కువ ఉన్న చోటే అభ్యర్థుల మార్పులు - చేర్పులు చేస్తున్నట్లు స్పష్టం చేశారు.