పెద్ద మనసు చాటుకున్న దీదీ.. 'అతడి'ని సొంతకారులో ఆస్పత్రికి పంపించి..

బంగాల్​ ముఖ్యమంత్రి మమతా బెనర్జీ.. తన మంచి మనసును చాటుకున్నారు. అనారోగ్యంతో కిందపడ్డ ఫొటో జర్నలిస్ట్​ను తన సొంతకారులో ఆసుపత్రికి తరలించారు. గురువారం బంగాల్​ రాజధాని కోల్​కాతాలో రెజర్లకు సంఘీభావంగా నిర్వహిస్తున్న క్యాండిల్ ర్యాలీలో ఈ ఘటన జరిగింది. ఈ కార్యక్రమానికి సంబంధించిన వార్తలు కవర్ చేస్తుండగా.. ఫొటో జర్నలిస్ట్ సుభ్రాంశు ఒక్కసారిగా కిందపడ్డాడు. వెంటనే స్పందించిన సీఎం మమత.. అతడికి నీళ్ల బాటిల్​ అందించారు. అనంతరం తన సొంత వాహనంలో ఆసుపత్రికి తరలించారు. కార్యక్రమం ముగిసిన అనంతరం సెక్యూరిటీ బైక్​పై వెళ్లిపోయారు. ఫొటో జర్నలిస్ట్​ ఆరోగ్య పరిస్థితిని తెలుసుకునేందుకు.. ఆసుపత్రికి సైతం వెళ్లారు మమతా బెనర్జీ.

అంతకు ముందు రెజ్లర్లకు మద్దతుగా చేపట్టిన కార్యక్రమంలో మాట్లాడిన మమతా.. బ్రిజ్ భూషణ్​పై పోక్సో కేసు నమోదు చేయాలన్నారు. కేవలం ఆయన రాజీనామా చేస్తే సరిపోదని.. అరెస్ట్ చేయాలని డిమాండ్​ చేశారు. తమ పోరాటాన్ని కొనసాగించాలని రెజర్లకు దీదీ సూచించారు. తమ జీవితాలు, స్వాతంత్ర్యం కోసం ఈ పోరాటం చేయాలన్నారు.