TDP Ex Minister Bhuma Akhila Priya Hunger strike: 'రాజన్న పాలన తెస్తానని చెప్పి.. రాక్షస పాలన తెచ్చారు'

 TDP Ex Minister Bhuma Akhila Priya Hunger strike: తెలుగుదేశం పార్టీ అధినేత, మాజీ ముఖ్యమంత్రి నారా  చంద్రబాబును ఇటీవల నంద్యాల జిల్లాలోని ఆర్కే ఫంక్షన్ హాల్ వద్ద సీఐడీ పోలీసులు అరెస్ట్ చేసిన విషయం తెలిసిందే. ఈ మేరకు చంద్రబాబు అరెస్ట్​ను ఖండిస్తూ.. గురువారం టీడీపీ రాష్ట్ర ప్రధాన కార్యదర్శి, మాజీ మంత్రి భూమా అఖిలప్రియ, ఆమె సోదరుడు..అదే ఆర్కే ఫంక్షన్ హాల్ వద్ద ఆమరణ నిరాహార దీక్ష చేపట్టారు. 

Bhuma Akhila Priya Comments: ఎలాంటి ఆధారాలు లేకుండా చంద్రబాబునాయుడుపై కక్ష సాధింపుతోనే అరెస్ట్ చేశారని.. భూమా అఖిలప్రియ ఆగ్రహం వ్యక్తం చేశారు. చంద్రబాబు అక్రమ అరెస్ట్ వైసీపీ ప్రభుత్వ పైశాచికానికి నిదర్శనం అని ఆమె దుయ్యబట్టారు. కక్షపూరితంగానే చంద్రబాబును పిటీ వారెంట్లతో జైల్లో పెట్టారని ఆరోపించారు. ఈ నేపథ్యంలో చంద్రబాబు అరెస్ట్​కు నిరసనగా ఆయనను అరెస్ట్ చేసిన ప్రదేశంలోనే ఆమరణ నిరాహార దీక్ష చేపట్టినట్లు ఆమె తెలిపారు. 'చంద్రబాబు వయసుకు సైతం గౌరవం ఇవ్వకుండా అరెస్ట్ చేశారు. కులాలు, మతాలు, పార్టీలకు అతీతంగా చంద్రబాబు అరెస్ట్​ను ఖండిస్తున్నారు. రాష్ట్రంలో  కక్ష్యసాధింపు చర్యలో భాగంగానే అరెస్ట్​లు జరుగుతున్నాయి. రాజన్న పాలన తెస్తానని.. రాక్షస పాలనను తీసుకువచ్చారు' అని అఖిలప్రియ ఆగ్రహం వ్యక్తం చేశారు.