Detroit NRIs Hunger Strike: చంద్రబాబుకు మద్దతుగా మరోసారి కదం తొక్కిన డెట్రాయిట్ ఎన్నారైలు.. రిలే నిరాహార దీక్షలు

Detroit NRIs Hunger Strike: స్కిల్ డెవలప్​మెంట్​ స్కామ్ కేసులో ఆరోపణలతో అరెస్టైనా టీడీపీ అధినేత, మాజీ ముఖ్యమంత్రి చంద్రబాబు.. అరెస్టుకు వ్యతిరేకంగా డెట్రాయిట్ ఎన్నారైలు మరోసారి కదం తొక్కారు. సీబీఎన్​తో పాటే తామంటూ.. భారీ స్థాయిలో రిలే నిరాహార దీక్షలు చేపట్టారు. ఆదివారం  ఫార్మింగ్టన్ హిల్స్​లో ఈ రిలే నిరాహార దీక్షను ప్రారంభించారు. ఉదయం 10 గంటల నుంచి సాయంత్రం 5గంటల వరకు ఈ దీక్ష కొనసాగింది. ‘బాబుతో పాటే మేము’, ‘బాబు అరెస్టు అక్రమం’ అంటూ ఎన్నారైలు నినదించారు.

ఈ కార్యక్రమంలో ఎన్ఆర్ఐ టీడీపీ, జనసేన నాయకులు పెద్ద సంఖ్యలో పాల్గొన్నారు. అలాగే అమెరికాలోని చంద్రబాబు అభిమానులు కూడా పెద్ద ఎత్తున ఈ కార్యక్రమంలో పాల్గొన్నారు. స్కిల్ డెవలప్​మెంట్​ స్కామ్ కేసులో చంద్రబాబు అరెస్టు విషయం తెలియగానే అమెరికాలోని మిచిగాన్ స్టేట్​లోని డెట్రాయిట్ నగరంలోని తెలుగు ఎన్నారైలు ఒక్క చోటికి చేరిన సంగతి తెలిసిందే. ప్రస్తుతం నిరసన వ్యక్తం చేసిన ప్రదేశంలో ఎన్టీఆర్ విగ్రహాన్ని పెట్టి తమ వ్యతిరేకతను ప్రదర్శించారు. చంద్రబాబును అక్రమంగా అరెస్టు చేశారని ఈ డెట్రాయిట్ తెలుగు ఎన్నారైలు ఆరోపించారు. రాజకీయ కుట్రతోనే కక్ష కట్టి చంద్రబాబును జైల్లోకి పంపించారని విమర్శించారు.