Bopparaju on OPS: పాత పింఛన్ విధానం అమలుకు ప్రభుత్వం పునరాలోచన చేయాలి: బొప్పరాజు

APJAC Amaravati President Bopparaju on OPS: పాత పింఛన్ విధానానికే ఏపీ ఐక్య కార్యచరణ సమితి(APJAC) అమరావతి కట్టుబడి ఉందని ఆ సంఘం అధ్యక్షుడు బొప్పరాజు వెంకటేశ్వర్లు స్పష్టం చేశారు. పాత పింఛన్ విధానం అమలుకు ప్రభుత్వం పునరాలోచన చేయాలని ఆయన డిమాండ్ చేశారు. గుంటూరు రెవెన్యూ కల్యాణ మండపంలో నిర్వహించిన ఏపీ జేఏసీ నాలుగో ప్రాంతీయ సదస్సుకు ఆయన ముఖ్య అతిథిగా హాజరయ్యారు. ఈ సందర్భంగా నిర్వహించిన సమావేశంలో బొప్పరాజు వెంకటేశ్వర్లు మాట్లాడుతూ.. సీపీఎస్ రద్దు, ఓపీఎస్ అమలు కోసం తొలి నుంచి పోరాడింది తామేనని చెప్పారు. పాత పింఛన్​పై హామీ ఇచ్చింది రాష్ట్ర ప్రభుత్వమేనన్న బొప్పరాజు... మళ్లీ చలో విజయవాడ పునరావృతం కాకూడదని ప్రభుత్వానికి చెప్పామని స్పష్టం చేశారు. ఉద్యోగుల సమస్యలపై ఈ ప్రభుత్వానికి ఇచ్చిన సమయం.. ఏ ప్రభుత్వానికీ ఇవ్వలేదని ఆయన తెలిపారు. 92 రోజులుగా అలుపెరుగని పోరాటం చేస్తున్నామని.. ఉద్యమం ఫలితంగానే చాలా డిమాండ్లు సాధించామని బొప్పరాజు వెంకటేశ్వర్లు స్పష్టం చేశారు.