Bezawada Bar Association Rally Against NIA Raids: న్యాయవాదులపై ఎన్​ఐఏ దాడులను ఖండించిన బెజవాడ బార్ అసోసియేషన్

Bezawada Bar Association Rally Against NIA Raids: చట్టాన్ని రక్షించే న్యాయవాదులపై ఎన్​ఐఏ (National Investigation Agency) కేసులు పెట్టటాన్ని బెజవాడ బార్ అసోసియేషన్ (Bezawada Bar Association) ఖండించింది. ఎన్​ఐఏ చర్యలకు నిరసనగా విజయవాడలో ర్యాలీని చేపట్టారు. బెజవాడ బార్ అసోసియేషన్ నుంచి కలెక్టర్ కార్యాలయం వరకు ర్యాలీ నిర్వహించి కలెక్టర్​కు వినతిపత్రం అందజేశారు. బాధితుల తరపున ఎన్​ఐఏ కేసుల్లో వాదనలు వినిపిస్తున్న న్యాయవాదులపై కేసులు పెట్టి.. వేధించటం సరికాదని అసోసియేషన్ అధ్యక్షుడు తెలిపారు. న్యాయవాదుల ఇళ్లలో తనిఖీలు చేసి..సెల్ ఫోన్లను స్వాధీనం చేసుకోవటం ఎన్​ఐఏ అరాచకానికి నిదర్శనమన్నారు. న్యాయవాదులను నిర్బంధించి భయభ్రాంతులకు గురిచేస్తున్నారని..  ఆ పరిసర ప్రాంతాలకి సైతం ఎవరినీ రానివ్వలేదని అన్నారు. ఎన్​ఐఏ కొంత మంది చేతిలో కీలుబొమ్మగా మారి.. న్యాయవాది వ్యవస్థపై దాడి చేస్తోందని మండిపడ్డారు. అసలు న్యాయవాదులను ఏ కేసులో ముద్దాయిలుగా చూపిస్తున్నారని ప్రశ్నించారు. ఈ విషయాన్ని హైకోర్టు సీజే, రాష్ట్ర, కేంద్ర ప్రభుత్వాల దృష్టికి తీసుకెళ్తామన్నారు.