తప్పుడు ప్రచారంపై సైబర్ క్రైమ్​కు వంగలపూడి అనిత ఫిర్యాదు.. తిరస్కరించిన పోలీసులు

Vangalapudi Anitha complained to Cyber Crime: సోషల్‌ మీడియాలో తనపై తప్పుడు ప్రచారం జరుగుతోందని విశాఖ సైబర్ క్రైమ్ పోలీసులకు వంగలపూడి అనిత ఫిర్యాదు చేశారు. ఇలాంటి కేసులు సైబర్ క్రైమ్​ పోలీసులు తీసుకోవడం కుదరదని చెప్పడంతో అనిత తీవ్ర అసంతృప్తి వ్యక్తం చేశారు.

Vangalapudi Anitha complained to Cyber Crime : వైఎస్సార్సీపీలో ఉంటేనే ఆడవాళ్లు, మిగతా పార్టీలో ఉంటే కాదా అని టీడీపీ మాజీ ఎమ్మెల్యే, తెలుగు మహిళ అధ్యక్షురాలు వంగలపూడి అనిత ప్రశ్నించారు. తన వీడియోను తప్పుగా ఎడిటింగ్‌ చేసి ప్రచారం చేసిన వారిపై చర్యలు తీసుకోరని ఆమె నిలదీశారు. పోలీసులు కనీసం ఫిర్యాదు తీసుకునేందుకూ భయపడుతున్నారని ధ్వజమెత్తారు. సోషల్ మీడియాలో తనపై అసత్య ప్రచారాలు చేస్తున్న వైఎస్సార్సీపీ సోషల్ మీడియా ప్రతినిధులపై చర్యలు తీసుకోవాలని కోరుతూ విశాఖలో సైబర్ క్రైమ్ పోలీసులకు వంగలపూడి అనిత ఫిర్యాదు చేశారు.

ఫిర్యాదు తిరస్కరించిన సైబర్ క్రైమ్ : ఓ సమావేశంలో తాను ఒక విధంగా మాట్లాడితే దానిని తమకు అనుకూలంగా మార్చుకొని వైఎస్సార్సీపీ సోషల్ మీడియా ప్రతినిధులు తనపై అసత్య ప్రచారాలు చేస్తున్నారని అనిత ఫిర్యాదులో పేర్కొన్నారు. అయితే పోలీసులు ఇలాంటి కేసులు సైబర్ క్రైమ్​లో తీసుకోవడం కుదరదని చెప్పడంతో అనిత తీవ్ర అసంతృప్తి వ్యక్తం చేశారు. పోలీసులు అధికార పార్టీకి తొత్తులుగా వ్యవహరిస్తూ అన్యాయాలను సమర్థిస్తున్నారని ఆగ్రహం వ్యక్తం చేశారు. టీడీపీకి చెందిన కార్యకర్తలు ఎవరైనా సోషల్ మీడియా వేదికగా చిన్న చిన్న మెసెజ్​లు పెట్టినా వారిని స్టేషన్ పిలిపించి రెండు మూడు రోజులు స్టేషన్లోనే ఉంచిన పోలీసులకు తాను పెట్టిన కేసును తీసుకోవడం కుదరదని చెప్పడం విడ్డూరంగా ఉందని ఎద్దేవా చేశారు. తనకు జరిగిన అన్యాయంపై న్యాయ పోరాటం చేస్తానని స్పష్టం చేశారు. ఇటువంటి విషయాలు తమ పరిధిలోకి రావని సైబర్ క్రైమ్ పోలీసులు వెల్లడించారు.

ఫోర్జరీ సంతకంతో ఓ నకిలీ లేఖ : మార్చి 8 అంతర్జాతీయ మహిళా దినోత్సవం రోజున నారా లోకేష్ చేపట్టిన యువగళం పాదయాత్రలో తన ప్రసంగాన్ని వక్రీకరించిన వారికి తగిన బుద్ధి చెబుతానని, నిజాలు తెలుసుకోకుండా సాక్షి టీవీలో వీడియో ప్రసారం చేసినందుకు ఫిర్యాదు చేస్తానని వంగలపూడి అనిత చెప్పారు. గురువారం మధ్యాహ్నం విశాఖపట్నం టీడీపీ కార్యాలయంలో నిర్వహించిన విలేకర్ల సమావేశంలో అనిత మాట్లాడుతూ తన ప్రాణం ఉన్నంత వరకు జగన్‌ సీఎం అవుతారనే మాటను అననని అన్నారు. ప్రదీప్‌ అనే అతను తన మాటలను వక్రీకరించి సోషల్ మీడియాలో వీడియో పెట్టినట్లుగా తెలిసిందని, అతని వెనుక వైఎస్సార్సీపీ నేతల హస్తం ఉందని ఆమె ఆరోపించారు. ఈ విషయంపై టీడీపీ రాష్ట్ర అధ్యక్షుడు అచ్చెన్నాయుడు తనకు షోకాజ్‌ నోటీసు జారీ చేసినట్లు ఫోర్జరీ సంతకంతో ఓ నకిలీ లేఖను విడుదల చేశారని ఆమె అన్నారు.

సాధారణ మహిళల పరిస్థితి ఏంటి : పోలీస్ స్టేషన్​లు కన్సల్టెన్సీ సెంట్రల్​గా మారాయని వంగలపూడి అనిత ఆరోపించారు. తనపై సోషల్ మీడియాలో తప్పుడు పోస్టులు పెట్టిన వారిపై చర్యలు తీసుకోవాలని పాయకరావుపేట పోలీస్ స్టేషన్​లో గురువారం తాను ఫిర్యాదు చేశానని తెలిపారు. అయితే దీనిని కోర్టులో పరిష్కరించుకోవాలని తనకు ఎస్​హెచ్ ఎక్నాలజిమెంట్ ఇచ్చారని, దీనిపై అనకాపల్లి జిల్లా ఎస్పీ గౌతమిశాలికి ఆమె శుక్రవారం ఫిర్యాదు చేసారు. మాజీ మహిళా ఎమ్మెల్యే పైనే సోషల్‌ మీడియా వేదికగా అసత్య ప్రచారాలు జరుగుతుంటే సాధారణ మహిళల పరిస్థితి ఏంటని వంగలపూడి అనిత ప్రశ్నించారు. పోలీస్ స్టేషన్​నప ఆశ్రయిస్తే కోర్టులో తేల్చుకోవాలని చెప్పడం ఎంత వరకు సమంజసమని ఆమె ప్రశ్నించారు. సీఎం జగన్ ప్రభుత్వంపై ఎవరైనా సోషల్ మీడియాలో విమర్శలు చేస్తే వెంటనే చర్యలు తీసుకుంటున్న పోలీసులు, ఈ విషయంపై కోర్టుని ఆశ్రయించాలనడం విడ్డూరంగా ఉందని అన్నారు.

న్యాయం జరిగే వరకూ న్యాయ పోరాటం చేస్తా : అమరావతి విషయములో ఒక మహిళ సోషల్ మీడియాలో మాట్లాడితే సీఐడీ పోలీసులు ఆమెపై వెంటేనే చర్యలు తీసుకున్నారని అన్నారు. వైఎస్ భారతిపై సోషల్ మీడియాలో వ్యతిరేకంగా ప్రచారం చేస్తున్నారంటూ రాష్ట్ర మహిళా కమిషన్ అధ్యక్షురాలు వాసిరెడ్డి పద్మ డీజీపీకి ఫిర్యాదు చేస్తే వాళ్ళు కోర్టులో తేల్చుకోవాలని సమాధానం ఇచ్చారా అని ప్రశ్నించారు. మన రాష్ట్రంలో అధికార పార్టీకి ఒక న్యాయం ప్రతి పక్షాలకు మరో న్యాయం అన్నట్లుగా పోలీసులు వ్యవహరిస్తున్నారని దుయ్యబట్టారు. తనపై సోషల్ మీడియాలో తప్పుడు ప్రచారం చేసిన వారిపై చర్యలు తీసుకునేంత వరకు తాను న్యాయ పోరాటం చేస్తానని వంగలపూడి అనిత స్పష్టం చేశారు.

ఇవీ చదవండి