ట్రాఫిక్ ఉల్లంఘన రాయుళ్లకు సినిమా చూపిస్తామంటున్నారు నెల్లూరు పోలీసులు. ట్రాఫిక్ దిద్దుబాటు చర్యల్లో భాగంగా నగరంలో ఎన్ని చర్యలు తీసుకుంటున్నా ఉల్లంఘనులకు అడ్డుకట్ట వేయలేకపోతున్నారు. దీంతో ఓ వినూత్న ప్రయోగానికి తెరదీశారు వారు. ట్రాఫిక్ నిబంధనలు పాటించకపోతే, ఎలాంటి ఇబ్బందులు ఎదరవుతాయో తెలిపేలా ఓ విజువల్ ప్రజెంటేషన్ను తయారు చేశారు. అందుకోసం ట్రాఫిక్ పోలీసు స్టేషన్ కౌన్సిలింగ్ సెంటర్లో ఓ మినీ సినిమా హాలును సిద్ధం చేశారు. 20 మంది కూర్చునేలా కుర్చీలు వేసి, సినిమా చూపిస్తున్నారు. అల్పాహారం కూడా వారికి అందిస్తూ... అర్థమయ్యేలా వివరిస్తున్నారు. ముఖ్యంగా యువకులు, ఆటోడ్రైవర్లు. మైనర్లు, తాగి నడిపే వాహనదారులు, ట్రిపుల్ రైడింగ్, సెల్ఫోన్ డ్రైవింగ్ చేసేవారికి ఈ హాల్లో సినిమా చూపిస్తున్నారు. మైనర్ల విషయంలో తల్లిదండ్రులకు సినిమా కౌన్సిలింగ్ ఇస్తున్నారు. తల్లిదండ్రుల నిర్లక్ష్యంతో పిల్లల భవిష్యత్ ఎలా దెబ్బతింటుందో తెలియజేస్తున్నారు. ఒక్కొక్కరికి గంట సమయం కేటాయిస్తున్నట్లు ట్రాఫిక్ పోలీసులు తెలియజేస్తున్నారు.
ఒకసారి కౌన్సిలింగ్కు హాజరై ట్రాఫిక్ ఉల్లంఘన కేసులో మరోసారి దొరికితే.. చర్యల్లో స్థాయిని పెంచుతున్నారు పోలీసులు. ఒకటి, రెండుసార్లు కౌన్సిలింగ్ ఇచ్చాక, మళ్లీ మూడోసారి దొరికితే, లైసెన్స్ను రద్దు చేస్తున్నారు. విద్యార్థుల విషయంలో కౌన్సిలింగ్ కార్యక్రమంలో కళాశాలల ప్రిన్సిపల్స్ సైతం పాల్గొనేలా చేసి, సదరు విద్యార్థులకు నచ్చజెప్పే ప్రయత్నం చేస్తున్నారు. పెనాల్టీ వసూలు చేసే బదులు ప్రజల్లో అవగాహన కల్పించడంతోనే ప్రజల్లో మార్పు వస్తుందని అంటున్నారు. ట్రాఫిక్ రూల్స్ పాటించాల్సిన పద్ధతిలో గంట నిడివిగల విజువల్స్ చూపిస్తారు. వారి వివరాలను కంప్యూటర్లో నిక్షిప్తం చేయడం ద్వారా ఉల్లఘనులపై ఎప్పుడూ ఓ కన్నేసి ఉంచుతున్నట్టు పోలీసులు చెబుతున్నారు.
ఇదీ చూడండి: ఆవుల మృతి... సిట్ ఏర్పాటు చేస్తూ డీజీపీ నిర్ణయం
