ఉపరాష్ట్రపతి ముప్పవరపు వెంకయ్యనాయుడుకి తెలుగుదేశం అధినేత చంద్రబాబు హృదయపూర్వక పుట్టినరోజు శుభాకాంక్షలు తెలిపారు. ఆయన తనకు మిత్రుడని, తెలుగు ప్రజల శ్రేయోభిలాషి అని, తెలుగు భాషాభిమాని అని కొనియాడారు. ఆయన సంపూర్ణ ఆయురారోగ్యాలతో ఆనందంగా వర్ధిల్లాలని మనసారా కోరుకుంటున్నట్లు తెలిపారు.
ఉపరాష్ట్రపతి వెంకయ్య నాయుడుకి తెదేపా జాతీయ ప్రధాన కార్యదర్శి లోకేశ్, మాజీమంత్రి సోమిరెడ్డి చంద్రమోహన్ రెడ్డి జన్మదిన శుభాకాంక్షలు తెలిపారు. వ్యవసాయ కుటుంబంలో పుట్టి ఉపరాష్ట్రపతి స్థాయి వరకు ఎదిగిన తెలుగువెలుగు, వెంకయ్యనాయుడని లోకేశ్ కొనియాడారు. ప్రజా రాజకీయాలలో ఆయన నడిచిన బాటలే తమకు ఆదర్శమని.. సంపూర్ణ ఆయురారోగ్యాలతో ఆనందంగా వర్ధిల్లాలని మనసారా కోరుకుంటున్నట్లు పేర్కొన్నారు.
వెంకయ్య నాయుడుతో జనతా పార్టీలో కలిసి పనిచేసే అవకాశం తమ కుటుంబానికి ఆ రోజుల్లో దక్కిందని మాజీ మంత్రి సోమిరెడ్డి చంద్రమోహన్ రెడ్డి గుర్తు చేసుకున్నారు. దీనిని మహద్భాగ్యంగా భావిస్తున్నట్లు తెలిపారు. అప్పటినుంచి ఆయనను తమ కుటుంబసభ్యుల్లో ఒకరిగా గౌరవించుకుంటున్నామన్నారు. భవిష్యత్తులో ఆయన ఉన్నత సోపానాలు అధిరోహించాలని మనసారా ఆకాంక్షిస్తున్నట్లు పేర్కొన్నారు.
ఇదీ చూడండి. రాష్ట్ర సరిహద్దులో కిలోమీటరు మేర వాహనాలు బారులు
