వారిద్దరూ రామలక్ష్మణులే: నారా రోహిత్

చంద్రబాబు, ఆయన సోదరుడు రామ్మూర్తి నాయుడికి మధ్య మనస్పర్థలు ఉన్నాయంటూ వస్తున్న వార్తలపై సినీ నటుడు, చంద్రబాబు తమ్ముడి కుమారుడు నారా రోహిత్ స్పందించారు. వారిద్దరూ రామలక్ష్మణుల్లా కలిసే ఉన్నారని ప్రకటించారు. తప్పుడు ప్రచారాలు చేయొద్దని కోరారు.

నారా రోహిత్ విడుదల చేసిన పత్రికా ప్రకటన

ముఖ్యమంత్రి చంద్రబాబు నాయుడు, ఆయన సోదరుడు రామ్మూర్తి నాయుడు మధ్య విభేదాలు ఉన్నాయంటూ వస్తున్న పుకార్లపై.. రామ్మూర్తి నాయుడు కుమారుడునారా రోహిత్ స్పందించారు. తన తండ్రికి, పెదనాన్న చంద్రబాబుకు ఎలాంటి విభేదాలు లేవని స్పష్టం చేస్తూ.. పత్రికా ప్రకటన విడుదల చేశారు. వారిద్దరూ రామలక్ష్మణుల్లాగే కలిసి ఉన్నారని స్పష్టం చేశారు. స్వార్థ రాజకీయ ప్రయోజనాల కోసం అన్నదమ్ముల మధ్య విభేదాలు సృష్టించొద్దని కోరారు. నారా పేరును నిలబెట్టడానికి తమ కుటుంబం నుంచి ఒక్కరు చాలని.... కనుకనే తామంతా క్రియాశీలక రాజకీయాలకు దూరంగా ఉన్నామని వెల్లడించారు. రాజకీయ ప్రయోజనాల కోసం తమ కుటుంబంపై బురద చల్లవద్దని కోరారు. రాష్ట్ర ప్రజలతోపాటు నారా కుటుంబ సభ్యులు కూడా చంద్రబాబును ఆదర్శంగా తీసుకుని ఆయన అడుగు జాడల్లోనే నడుస్తారని రోహిత్‌ స్పష్టం చేశారు.

ప్రతిపక్ష నేతపై 'ప్రతినిధి' ఫైర్

తమ కుటుంబాన్ని చంద్రబాబు నిర్లక్ష్యం చేశారన్న వాదన నూటికి నూరుపాళ్లు అవాస్తమని రోహిత్ కొట్టిపారేశారు. రాత్రింబవళ్లు శ్రమించి 5 కోట్ల ఆంధ్రప్రదేశ్‌ ప్రజలను ఏవిధంగా చూసుకుంటున్నారో.. తమనూ అదేవిధంగా చూసుకుంటున్నారని తెలిపారు. ఎంపీ పదవి కోసం సొంత బాబాయి మీదనే చేయి చేసుకున్న చరిత్ర వైఎస్‌ కుటుంబానిదన్న ఆయన... తమకు పదవులు ముఖ్యం కాదని స్పష్టం చేశారు. కోర్టులు, జైళ్లచుట్టూ తిరిగే వారికి కుటుంబ బంధాల గురించి ఎలా తెలుస్తుందని ప్రశ్నించారు. ప్రతి సంవత్సరం తమతో కలిసి చంద్రబాబు సంక్రాంతి పండుగ జరుపుకొంటున్నారని గుర్తు చేశారు. ముఖ్యమంత్రిలా కాకుండా ఒక కుటుంబ పెద్దగా తమకోసం శ్రమిస్తున్నారన్నారు. తన తండ్రి ఆరోగ్య పరిస్థితి బాగోలేదు కనుకనే.. ఆయన ఇంటికే పరిమితమయ్యారని తెలిపారు. రాజకీయంగా చంద్రబాబుని ఎదుర్కోలేకనే.. కుటుంబ సభ్యులపై, వారి వ్యక్తిగత విషయాలపై అసత్య ప్రచారం చేస్తున్నారని రోహిత్‌ ఆరోపించారు. నారా కుటుంబంలో చీలికలు, మనస్పర్థలు తీసుకొచ్చి రాజకీయ లబ్ది పొందాలనుకోవడం దివాళాకోరు తనానికి నిదర్శనమని రోహిత్‌ అన్నారు.