Ind vs Aus 3rd T20 : మొదటి టీ20 సొంత తప్పిదాలతో ఓడిపోయారు. రెండో మ్యాచ్ జరుగుతుందో లేదో అన్న సందిగ్ధం ఏర్పడింది. దీంతో 8 ఓవర్లకు కుదించిన మ్యాచ్లో విజయం సాధించారు. కానీ ఇదంతా నాణేనికి ఒకవైపే. ఈ గెలుపు ఓటములుపై చర్చకు తెరపడలేదు. మెగా టోర్నీ ముందు చిన్న తప్పును కూడా భూతద్దంలో వెతికి మరీ విమర్శించిన వారు ఉన్నారు. ఏది ఎలాగున్నా.. సిరీస్ డిసైడర్ మ్యాచ్లో అన్ని విభాగాల్లో రాణించి సిరీస్ను కైవసం చేసుకుంది. గత తప్పుల నుంచి నేర్చుకుని టీమ్ ఇండియా మంచి ప్రదర్శన చేసింది. అదే కాకుండా ఈ సిరీస్ డిసైడర్ మ్యాచ్.. అనేక రికార్డులకూ వేదికైంది.
భారత్-ఆసీస్ మొదటి ఇన్నింగ్స్లో అక్షర్ పటేల్ అద్భుత ప్రదర్శన చేసి మూడు వికెట్లు తీశాడు. అతడికి తోడు జస్ప్రీత్ బుమ్రా.. ఆసీస్ బౌలర్లను కట్టడి చేయడంలో సఫలమయ్యాడు. ఇక రెండో ఇన్నింగ్స్లో.. ఓపెనర్లు ఇద్దరు ఔట్ అయినా.. ఆ తర్వాత వచ్చిన సూర్య కుమార్ యాదవ్, విరాట్ కోహ్లీ అద్భుత ప్రదర్శన చేశారు. కోహ్లీ 63(48), సూర్య 69(36) బాదారు.
టీ20 ఛాంపియన్ సూర్య..
2022లో టీ20ల్లో అత్యధిక పరుగులు సాధించిన ఆటగాడిగా సూర్య కుమార్ యాదవ్ నిలిచాడు. ఈ ఏడాది ఆడిన 20 మ్యాచ్ల్లో 37.88 సగటుతో 682 పరుగులు చేశాడు. ఇందులో ఒక సెంచరీ, నాలుగు అర్ధ శతకాలు ఉన్నాయి. అత్యధికంగా 117 పరుగులు చేశాడు. మొత్తంగా ఇతడి స్ట్రైక్ రేట్ 182.84గా ఉంది. ఆదివారం జరిగిన మ్యాచ్లో 191.67 స్ట్రైక్ రేట్తో ఈ 69 పరుగులు చేశాడు. ఇతడి తర్వాతి స్థానాల్లో నేపాల్కు చెందిన దిపేంద్ర సింగ్ అయిరీ(626), చెక్ రిపబ్లిక్కు చెందిన సబవూన్ దవిజి(612), పాకిస్థాన్ బ్యాటర్ మహ్మద్ రిజ్వాన్(556), వెస్టీండీస్ బ్యాటర్ నికోలస్ పూరన్(553) ఉన్నారు.
కోహ్లీ మరో ఘనత..
అయితే కోహ్లీ తాజాగా చేసిన 63 పరుగులతో.. టీ20, వన్డేల్లో కలిపి 16 వేల పరుగులు పూర్తి చేసిన రెండో క్రికెటర్గా రికార్డు సృష్టించాడు. మొత్తం 369 మ్యాచ్ల్లో.. 352 ఇన్నింగ్స్ల్లో 55.95 సగటుతో ఈ పరుగులు సాధించాడు. అందులో 44 సెంచరీలు, 97 హాఫ్ సెంచరీలు ఉన్నాయి. ఈ వైట్బాల్ ఫార్మాట్లో మొదటగా 16 వేల పరుగులు సాధించాడు దిగ్గజ క్రికెటర్ సచిన్ తెందూల్కర్.
వన్డేల్లో 262 మ్యాచ్లు ఆడి 57.68 సగటుతో 12,344 పరుగులు చేశాడు. అందులో 64 హాఫ్ సెంచరీలు, 43 సెంచరీలు ఉన్నాయి. అత్యధికంగా 183 పరుగులు చేశాడు. టీ20ల్లో 107 మ్యాచ్లో ఆడి 50.86 సగటుతో 3,660 పరుగులు చేశాడు. అందులో 33 హాఫ్ సెంచరీలు ఉన్నాయి. ఆసియా కప్లో ఆఫ్గనిస్థాన్పై ఒక సెంచరీ చేశాడు. ఈ మ్యాచ్లో 122 పరుగులు చేసి నాటౌట్గా నిలిచాడు.
ఇవీ చదవండి :'మీరు చేస్తే ఒప్పు.. మేము చేస్తే తప్పా'.. ఏది క్రీడా స్ఫూర్తి?
