మరికొద్ది రోజుల్లో ఇండియన్ ప్రీమియర్ లీగ్ ఆరంభం కానుంది. ఇప్పటికే ఆయా వేదికలు ఈ సంబరాలు కోసం సిద్ధమయ్యాయి. అభిమానులందరూ తమ క్రికెట్ హీరోలను కలర్ఫుల్ జెర్సీల్లో చూసేందుకు ఎంతో ఆతృతగా ఉన్నారు. తాజాగా మళ్లీ కొవిడ్ మహమ్మారి.. వ్యాప్తిస్తున్న వేళ ఫ్రాంచైజీలు కూడా తమ ఆటగాళ్ల ఆరోగ్య దృష్ట్యా తగు జాగ్రత్తలు పాటించాలంటూ బీసీసీఐ కీలక ఆదేశాలు జారీ చేసిందట. ఈ క్రమంలో ఐపీఎల్ ఆటగాళ్లకు కొవిడ్ టెస్ట్ నిర్వహించడంతో పాటు పాజిటివ్ వచ్చిన వారు తప్పనిసరిగా వారం రోజులు ఐసోలేషన్లో ఉండేలా చూసుకోవాలని సూచించినట్లు సమచారం.
అయితే ఈ సీజన్లో మాత్రం ఐసోలేషన్ వరకే నిబంధనలు పెట్టిన బీసీసీఐ.. 2020-21లో లాగా బయో బబుల్లో ఆడించే ఆలోచనలో లేదని బీసీసీఐ వర్గాల టాక్. భారత్లో కరోనా, ఇన్‌ఫ్లుయెంజా కేసుల కలకలంతో బీసీసీఐ కూడా అప్రమత్తంగా ఉందని.. పాజిటివ్ సోకినా లేక లక్షణాలున్న క్రికెటర్లను కచ్చితంగా ఏడు రోజులు ఐసోలేషన్లో ఉంచనున్నట్లు బీసీసీఐ చెందిన ఓ అధికారి పేర్కొన్నారు. ఇక ఈ సీజన్లో పాజిటివ్ వచ్చిన క్రికెటర్లను మ్యాచ్లు ఆడేందుకు అసలు అనుమతించరని తెలిపారు. అయితే ఐసోలేషన్లో ఉన్న క్రికెటర్ ఐదో రోజు తర్వాత మరోసారి కొవిడ్ టెస్ట్ చేయించుకుని అందులో నెగిటివ్ రిజల్ట్ వస్తే అప్పుడు ఆడనిస్తామని అన్నారు.
బబుల్స్లో ఐపీఎల్ ఆట!
2020 కరోనా కల్లోలం సృష్టించిన వేళ ఆ ఏడాది ఐపీఎల్ సీజన్ను అత్యంత జాగ్రత్తల నడుమ కఠినమైన బయో బబుల్స్లో నిర్వహించింది బీసీసీఐ. కానీ అప్పుడు మ్యాచ్లు సగం కూడా పూర్తవ్వకముందే పలు ఫ్రాంచైజీల ప్లేయర్లకు కొవిడ్ 19 సోకింది. దీంతో బీసీసీఐ ఐపీఎల్ను అర్థంతరంగా రద్దు చేసింది. కానీ 2021-22లో మాత్రం అటువంటి పరిస్థితులు మళ్లీ రాకుండా జాగ్రత్తపడింది. ఇక 2019 తర్వాత బీసీసీఐ మళ్లీ హోం అండ్ అవే సిస్టమ్ను ఐపీఎల్లో తీసుకురానుందట. ఇకపై కేసుల పెరుగుదల వల్ల ఐపీఎల్ను నిలిపివేసే దుస్థితి కలగకూడదని ఈ నిర్ణయం తీసుకుందట.
కరోనా విజృంభించిన సమయంలో ఆ వైరస్ సోకిన ఆటగాళ్లను మైదానంలోకి అడుగుపెట్టనివ్వలేదు బీసీసీఐ. అయితే ఈ వైరస్ ఉధృతి తగ్గుముఖం పట్టిన తర్వాత పలు నిబంధనలకు మార్పులు చేర్పులు చేశారు. కొవిడ్ టెస్టుల్లో పాజిటివ్ వచ్చిన ఆటగాళ్లను సైతం గేమ్ ఆడించారు. అలా పాజిటివ్ రిజల్ట్తో ఆడిన తొలి క్రికెటర్ ఆసీస్ టీమ్కు చెందిన తహీలా మెక్గ్రాత్. కామన్వెల్త్ క్రీడల్లో భాగంగా గతేడాది భారత్తో జరిగిన మ్యాచ్లో ఆమె ఆడింది. ఇక మెక్గ్రాత్ తర్వాత మాథ్యూ వేడ్, రెన్షాలు కూడా పాజిటివ్ అని తెలిసినప్పటికీ మైదానంలో జట్టు తరఫున ఆడారు.
