ప్రధానమంత్రి నరేంద్రమోదీ.. భారత్కు చెందిన ప్రముఖ క్రికెటర్లు, క్రీడాకారులతో, శుక్రవారం వీడియో కాల్లో మాట్లాడారు. ప్రస్తుత పరిస్థితులపై చర్చించారు. 49 మంది ఉన్న ఈ జాబితాలో కెప్టెన్ కోహ్లీ, బీసీసీఐ అధ్యక్షుడు సౌరభ్ గంగూలీ, కేంద్రమంత్రి కిరణ్ రిజుజు తదితరులు ఉన్నారు.
"లాక్‌డౌన్‌ సమయంలో ప్రజలంతా ఇంట్లోనే ఉండాలని విజ్ఞప్తి చేయాలి. వారిలో ధైర్యాన్ని పెంచుతూ, సామాజిక దూరం పాటించాలని కోరాలి. ప్రస్తుతం మీరు ప్రజలకు ఇచ్చే సందేశాలు ఎంతో కీలకం. క్రీడా శిక్షణలో మీరు నేర్చుకున్న స్వీయ క్రమశిక్షణ, సానుకూలత, ఆత్మవిశ్వాసం, సవాళ్లను ఎదుర్కొనే సామర్థ్యం.. వైరస్‌ వ్యాప్తిని కట్టడిచేయడానికి ఉపయోగించాలి. మైదానాంలో పోరాడిన తీరుతోనే మహమ్మారిని ఎదుర్కోవాలి" అని క్రీడాకారులతో మోదీ అన్నారు.
"ప్రజలకు మీరిచ్చే సందేశాల్లో ఈ ఐదు అంశాలను చేర్చాలి. మహమ్మారిపై పోరాడాలనే 'సంకల్పం', సామాజిక దూరాన్ని అనుసరించాలనే 'నిగ్రహం', సానుకూలత ధోరణిలో ఉండాలనే 'అనుకూలత', కరోనాపై చేస్తున్న యుద్ధంలో ముందుండి పోరాడుతున్న వైద్య, పోలీసు సిబ్బంది..మొదలైన వారిపై 'గౌరవం', పీఎం-కేర్స్‌కు తమ వంతు సాయం చేసేలా 'సహకారం' అనే అంశాలు ఉండాలి. ఆయుష్ మంత్రిత్వ శాఖ జారీచేసిన మార్గదర్శకాలను పాటించేలా ప్రజలకు సూచించాలి" అని ప్రధాని వెల్లడించారు.
మోదీతో మాట్లాడిన క్రికెటర్లతో సచిన్, కోహ్లీతో పాటు టీమిండియా మాజీ సారథి ధోనీ, రోహిత్ శర్మ, మాజీ క్రికెటర్ జహీర్ఖాన్, యువరాజ్ సింగ్, కేఎల్ రాహుల్ ఉన్నారు.
క్రికెటర్లు కాకుండా కాల్ మాట్లాడినవారిలో స్టార్ షట్లర్ పీవీ సింధు, జావెలిన్ త్రోవర్ నీరజ్ చోప్రా, చెస్ దిగ్గజం విశ్వనాథన్ ఆనంద్, స్ప్రింటర్ హిమాదాస్, ప్రముఖ బాక్సర్లు మేరీకోమ్, అమిత్ పంగల్, రెజ్లర్ వినేశ్ ఫొగాట్, యువ షూటర్ మను బాకర్ ఉన్నారు.
కరోనా కారణంగా ప్రస్తుతం భారత్లో క్రీడలకు సంబంధించిన అన్ని కార్యక్రమాలు నిలిచిపోయాయి. ఇప్పటికే వాయిదా పడి, ఈనెల 15 నుంచి ప్రారంభం కావాల్సిన ఐపీఎల్పై మాత్రం ఇంకా ఎలాంటి ప్రకటన వెలువడలేదు.
