ప్రస్తుతం 'ఆర్ఆర్ఆర్' మూవీతో బిజీగా ఉన్నారు అగ్ర దర్శకుడు ఎస్.ఎస్.రాజమౌళి. ఇప్పటికే చిత్రీకరణ పూర్తి చేసుకున్న ఈ సినిమా ప్రస్తుతం నిర్మాణానంతర కార్యక్రమాలు జరుపుకొంటోంది. మరి ఈ సినిమా తర్వాత రాజమౌళి చేయబోయే ప్రాజెక్ట్‌ ఏంటి? కథానాయకుడు ఎవరు? అన్న చర్చ ఇప్పుడు మొదలైంది. ఈ నేపథ్యంలో ప్రముఖ నిర్మాణ సంస్థ మైత్రీ మూవీ మేకర్స్‌ నిర్మాతలను జక్కన్న కలిశారట. వీరి కాంబినేషన్‌లో ఓ భారీ ప్రాజెక్టు పట్టాలెక్కే అవకాశం ఉన్నట్లు సినీ పరిశ్రమ వర్గాలు చెబుతున్నాయి.
భారతీయ చిత్ర పరిశ్రమలో మునుపెన్నడూ తెరకెక్కని భారీ బడ్జెట్‌తో ఈ సినిమా ఉంటుందని టాక్‌. ప్రస్తుతం కొత్త ప్రాజెక్టుకు సంబంధించి ప్రాథమిక చర్చలు మాత్రమే నడిచినట్లు తెలుస్తోంది. పూర్తి కథ ఏంటి? కథానాయకుడు ఎవరు? అన్న విషయాలు తెలియరాలేదు. దీనిపై త్వరలోనే అధికారిక ప్రకటన వెలువడే అవకాశం ఉంది.
మహేశ్తో సినిమా లేనట్టేనా?
మహేశ్‌బాబుతో ఓ మూవీ చేస్తానని రాజమౌళి గతంలోనే ప్రకటించారు. 'ఆర్ఆర్ఆర్' తర్వాత ఆ సినిమా ప్రారంభం కానుందని అందరూ భావిస్తున్నారు. అడ్వెంచర్‌, యాక్షన్‌ థ్రిల్లర్‌గా ఈ సినిమా తెరకెక్కే అవకాశం ఉందని ఓ ఇంటర్వ్యూలో రచయిత, రాజమౌళి తండ్రి విజయేంద్రప్రసాద్‌ చెప్పారు.
ఇప్పుడు రాజమౌళి మైత్రీ మూవీ మేకర్స్‌ నిర్మాతలను కలవడం వల్ల ఆసక్తిని కలిగిస్తోంది. మహేశ్ ప్రస్తుతం 'సర్కారు వారి పాట' సినిమాలో నటిస్తున్నారు. దాని తర్వాత త్రివిక్రమ్‌ క్యాంప్‌లోకి మహేశ్ పాల్గొంటారు. వచ్చే ఏడాది ద్వితీయార్ధంలో ఈ సినిమాను విడుదల చేయాలని భావిస్తున్నారు. మరి అప్పటివరకూ రాజమౌళి వేచి చూస్తారా? లేక మరో హీరోతో కొత్త ప్రాజెక్టు నిర్మిస్తారా? తెలియాల్సిఉంది.
ఇదీ చూడండి.. MAA Elections 2021: గెలిచినా.. ఓడినా.. 'మా' కోసమే!
