మరిన్ని కొత్త ఫీచర్లను అందుబాటులోకి తెచ్చేందుకు సిద్ధమైంది ప్రముఖ మెసేజింగ్ యాప్ వాట్సాప్. 2023లో డెస్క్టాప్ స్క్రీన్లాక్, వ్యూ వన్స్ టెక్స్ట్, ఐఫోన్ వినియోగదారులకు PiP వీడియో కాల్స్ సౌకర్యాన్ని అందుబాటులోకి తీసుకురానుంది. ఇప్పటికే బీటా యూజర్లకు పరీక్షిస్తుండగా.. త్వరలోనే అందరికి అందుబాటులోకి రానున్నట్లు తెలిపింది. అవేంటో ఓసారి చూద్దాం.
తేదీల వారీగా మెసేజ్ చూసేయచ్చు
ఇప్పటివరకు పాత మెసేజ్లు చూడాలంటే.. ఆ తేదీ గుర్తున్నా సరే.. అన్నీ స్క్రోల్ చేస్తూనే వెళ్లాల్సి ఉండేది. కానీ ఇప్పుడు నేరుగా మనకు కావాల్సిన తేదీలోని మెసేజ్ను చూసే అవకాశం ఉంటుంది. ఇది ప్రస్తుతానికి ఐఫోన్ వినియోగదారులకు మాత్రమే అందుబాటులో ఉంది.
- చాట్ విండోలోకి వెళ్లి కావాల్సిన ప్రొఫైల్ను ఎంపిక చేసుకోవాలి
- పైన ఉన్న సెర్చ్ బాక్స్పై క్లిక్ చేయాలి
- ఆ తర్వాత కింద ఉన్న క్యాలెండర్ ఐకాన్పై క్లిక్ చేసి కావాల్సిన తేదీని ఎంపిక చేసుకోవాలి.
డెడికేటెడ్ వీడియో మోడ్
ఫోటోలు, వీడియోలు మరింత సులభంగా తీసుకునేలా కొత్త ఫీచర్ను అందుబాటులోకి తీసుకురానుంది వాట్సాప్. ఇందుకోసం ప్రత్యేకంగా వీడియో ఆప్షన్ను తీసుకురానుంది. అంతకుముందు షటర్ బటన్ను లాంగ్ ప్రెస్ చేస్తే వీడియో రికార్డ్ అయ్యేది. ప్రస్తుతానికి ఇది కొన్ని ఆండ్రాయిడ్ వెర్షన్లలోనే అందుబాటులో ఉంది.
స్టేటస్ ప్రొఫైల్ రింగ్స్
స్టేటస్ బార్లోకి వెళ్లకుండా చాట్ స్క్రీన్ నుంచే కాంటాక్ట్స్లో ఉన్న వారి స్టేటస్ను చూసే ఆప్షన్ను అందుబాటులోకి తీసుకురానుంది వాట్సాప్. మన కాంటాక్ట్లోని వ్యక్తి స్టేటస్ పెడితే ప్రొఫైల్ పిక్చర్పై ఆకుపచ్చ రంగుతో రింగ్ వస్తుంది.
కాంపానియన్ మోడ్
ప్రస్తుతం ఒక వాట్సాప్ అకౌంట్ను ఒక ఫోన్లో మాత్రమే వినియోగించుకోగలం. ఈ సమస్యకు చెక్ పెట్టేలా కొత్తగా కాంపానియన్ మోడ్ను తీసుకువస్తుంది వాట్సాప్. దీని ద్వారా ఒకే నెంబర్తో అనేక ఫోన్లలో లాగిన్ అయ్యే అవకాశం ఉంటుంది. ప్రైమరీ ఫోన్లో లాగౌట్ కాకుండానే మరో ఫోన్లో లాగిన్ కావచ్చు.
పిన్న్డ్ మెసేజ్
పిన్నింగ్ మెసేజ్ ఫీచర్ను అందుబాటులోకి తీసుకురానుంది వాట్సాప్. దీంతో మనకు అవసరమైన మెసేజ్ను మొత్తం స్క్రోల్ చేయకుండా టాప్లోనే పిన్ చేసుకోవచ్చు.
వాట్సాప్ బిజినెస్ డైరెక్టరీ
ఇప్పటికే వాట్సాప్ బిజినెస్ను అందుబాటులోకి తీసుకురాగా.. ఇప్పుడు తాజాగా బిజినెస్ డైరెక్టరీని తీసుకురానుంది. మన సమీపంలో ఉన్న రెస్టారెంట్లు, గ్రాసరీ స్టోర్స్, ఆటోమొబైల్ సర్వీస్ ఇలా ప్రతీ రంగానికి సంబంధించిన వివరాలను అందించేలా కొత్త ఫీచర్ను తీసుకురానుంది.
వాట్సాప్ డెస్క్టాప్ మోడ్ స్క్రీన్ లాక్
వాట్సాప్ యాప్ మాదిరిగా డెస్క్టాప్నకు కూడా స్కీన్లాక్ ఆప్షన్ అందుబాటులోకి రానుంది. బయోమెట్రిక్ ఆప్షన్తో కాకుండా పాస్వర్డ్ మాత్రమే పెట్టుకునేలా ఉండనుంది.
ఐఫోన్ యూజర్లకు PiP వీడియో కాల్ మోడ్
ప్రస్తుతం ఆండ్రాయిడ్ యూజర్లకు అందుబాటులో ఉన్న పిక్చర్ ఇన్ పిక్చర్ వీడియో కాల్ మోడ్ను ఐఫోన్ వినియోగదారులకు అందుబాటులోకి రానుంది. దీంతో వీడియో కాల్ను మినిమైజ్ చేసుకుని స్క్రీన్పై పక్కకు పెట్టుకుని మరో పని చేసుకోవచ్చు.
