Whatsapp tricks for android users : ఆధునిక కాలంలో వాట్సాప్ వాడని వారంటూ ఎవరూ ఉండరు. ఇది ఆండ్రాయిడ్, ఐఓఎస్లో సపోర్ట్ చేసే ఫ్రీ మెసేజింగ్ యాప్. ఇప్పటికే ఎన్నో అప్డేట్స్ వచ్చినప్పటికీ దానిలో ఉన్న కిటుకులు చాలా మందికి తెలియదు. వాట్సాప్ను ఇంకా మెరుగ్గా ఉపయోగించేందుకు ఈ 5 ట్రిక్స్ మీ కోసం..
గ్రూప్లో మెసేజ్లు చూసేయొచ్చు సీక్రెట్గా..
సాధారణంగా గ్రూప్లో కొన్ని వందల మెసేజ్లు వస్తుంటాయి. అందరూ అన్ని మెసేజ్లు చదవటానికి ఇష్టపడరు. అలా అని మనం ఒక్క మెసేజ్ చూడాలని గ్రూప్ ఓపెన్ చేస్తే ఇక అంతే.. బ్లూటిక్ వల్ల అన్ని మెసేజ్లు చూసినట్లు తెలిసిపోతుంది. ఇలా ఇబ్బందులు పడకుండా ఉండాలంటే వాట్సాప్లో ఓ కొత్త ఫీచర్ మనకు అందుబాటులో ఉంది.. ఆండ్రాయిడ్ ఫోన్ హోమ్ స్క్రీన్పై వాట్సాప్ విడ్జెట్ను ప్లేస్ చేస్తే సరిపోతుంది. ఒక చిన్న స్క్రీన్లో అన్ని మెసేజ్లు కనిపిస్తాయి. స్క్రోలింగ్ సదుపాయంతో మెసేజ్లను ఈజీగా చూసేయొచ్చు.
విడ్జెట్ ఓపెన్ చేయడం ఎలా..
హోమ్స్క్రీన్ పై లాంగ్ ప్రెస్ చేస్తే కొన్ని ఆప్షన్లు కనిపిస్తాయి. అందులో విడ్జెట్ ఆప్షన్ ఒకటి. దాన్ని ఎంచుకుని స్క్రోల్ చేస్తే అందులో వాట్సాప్ విడ్జెట్ లభ్యమవుతుంది. దాన్ని సెలక్ట్ చేసుకోండి అంతే.. ఇక ఎవరికి తెలియకుండా వాట్సాప్ మెసేజ్లు చదివేయొచ్చు ఈజీగా.
చాట్కి పెట్టేయొచ్చు టైమర్ ఇలా..
ఇటీవలే వాట్సాప్లో పాపులరైన ఫీచర్లలో డిస్అప్పీయరింగ్ మెసేజ్లు ఒకటి.. నిర్దిష్టమైన సమయంలో మెసేజ్లు వాటంతట అవే మాయమయిపోతాయి. దీని వల్ల చాట్ హిస్టరీ డిలీట్ అవ్వడమే కాకుండా మెమొరీ క్లీన్ అవుతుంది. అయితే చాలా వరకు ఈ ఫీచర్ని మాన్యువల్ ఉపయోగించేవారే ఎక్కువగా ఉన్నారు. ఒక చాట్కి టైమర్ సెట్ చేయడమో లేకపోతే మాన్యువల్గా డిలీట్ చేయడమో చేసేవారు ఉన్నారు. అలాంటివారి కోసం ఈ ఆటో టైమర్ ఆప్షన్ ఉపయోగపడుతుంది.
ఆటో టైమర్ సెట్ చేయడం ఎలా..
వాట్సాప్ సెట్టింగ్స్ను ఎంచుకోవాలి. సెట్టింగ్స్లో అకౌంట్ సెట్టింగ్స్ను ఎంచుకున్నాక అందులో ప్రైవసీ ఆప్షన్ను సెలక్ట్ చేసుకోవాలి. ప్రైవసీ సెట్టింగ్స్లో డీఫాల్ట్ మెసేజ్ టైమర్ సెట్టింగ్ అనే ఆప్షన్ కనిపిస్తుంది. దాన్ని సెలక్ట్ చేసుకున్నాక మనం అందులో మెసెజ్ డిసఅప్పీయరింగ్ టైమర్ను మనం 24 గంటలు, వారం లేదా 90 రోజులకు సెలక్ట్ చేసుకోవచ్చు. మనం ఈ ఆప్షన్ను ఎప్పుడు కావాలంటే అప్పుడు మార్చుకోవచ్చు.
తక్కువ డేటాతో బెటర్ క్వాలీటీ ఫొటోలను పంపేయండిలా..
మనం ఎప్పుడైనా వాట్సాప్లో ఫొటోలు షేర్ చేసేటప్పుడు క్లారిటీ గల ఫొటోలు పంపిచాంలంటే ఇక డేటా ఎక్కువైపోతుందేమో అని ఆలోచిస్తుంటాం. కానీ ఇక ఆ ఆలోచనను వదిలేయమంటోంది వాట్సాప్ సంస్థ.
సెట్టింగ్స్లోకి వెళ్లి.. స్టోరేజ్ అండ్ డేటాను ఎంచుకోవాలి.
ఆప్షన్ను ఎంచుకుని స్క్రోల్ చేశాక ఫొటో అప్లోడ్ క్వాలిటీ అనే ఆప్షన్ కనిపిస్తుంది.
అందులో బెస్ట్ క్వాలిటీ ఆప్షన్ను ఎంచుకోవాలి.
ఇక ఎంచక్కా మనం తక్కువ డేటాతో క్వాలిటీ ఫొటోలను పంపవచ్చు.
ఒక వేళ చాట్లో ఫొటోలు పంపించాలంటే.. వాట్సాప్ డాక్యుమెంట్ ద్వారా పంపించుకోవచ్చు.
చాట్ లేదా గ్రూప్కు షార్ట్కట్ పెట్టుకోవచ్చు ఇలా..
మనకు ముఖ్యమైన చాట్ లేదా గ్రూప్లు కొన్ని ఉంటాయి. ప్రతి సారి వాటితో అవసరం ఉంటుంది. అలాంటప్పుడు వాటిని మన ఫోన్ హోం స్క్రీన్ మీద షార్ట్కట్ రూపంలో పెట్టుకోవచ్చు. దీనికోసం ఆ చాట్ లేదా గ్రూప్లోకి వెళ్లి పైనున్న మూడు డాట్లను ఎంచుకోవాలి. అందులో మోర్ అనే ఆప్షన్ను ఎంచుకోవాలి. అందులో యాడ్ షార్ట్కట్ అనేది కనిపిస్తుంది. దాన్ని క్లిక్ చేస్తే ఆ చాట్ షార్ట్కట్ నేరుగా హోమ్ స్క్రీన్ పైకి వచ్చేస్తుంది. అలా ఎన్ని కావాలంటే అన్ని చాట్స్ లేదా గ్రూప్స్ను పెట్టుకోవచ్చు. తర్వాత వాటిని ఫోల్డర్ల సహాయంతో మేనేజ్ చేసుకోవచ్చు.
స్టోరేజ్ను మేనేజ్ చేసుకోవచ్చు ఇలా..
వాట్సాప్లో మనకు అనవసరమైన డేటా ఉంటుంది. అలాంటి డేటా మన ఫోన్ స్టోరేజ్ను ఎంతోకొంత ఆక్రమించేసుకుంటుంది. కొన్నిసార్లు పాతడేటా సైతం మనకు తెలియకుండా ఎక్కడో స్టోర్ అయ్యుంటుంది. ఇలాంటి డేటా అన్నింటిని డిలీట్ చేసేందుకు యూజర్లు నానా తంటాలు పడుతుంటారు. ఇక పై ఆ బాధ లేకుండా ఈజీగా డేటాను క్లియర్ చేసేయచ్చు. ఎలా అంటే..
వాట్సాప్ సెట్టింగ్స్కు వెళ్లాలి.
అందులో స్టోరేజ్ అండ్ డేటా అనే ఆప్షన్ను ఎంచుకోవాలి. అక్కడే మేనేజ్ డేటా అనే మరో ఆప్షన్ కనిపిస్తుంది.
అక్కడ మనకు అన్ని చాట్స్ కనిపిస్తాయి. అందులో మనకు కావాల్సిన చాట్ను సెలక్ట్ చేసుకుని క్లియర్ చేసుకోవచ్చు.
ఇదీ చదవండి: సరికొత్త ఫీచర్స్తో నయా స్మార్ట్ఫోన్స్, సెప్టెంబర్లో రిలీజయ్యేవి ఇవే
