యాప్లో కొత్త అప్డేట్లు తీసుకురావడంలో వాట్సాప్ది ప్రత్యేక స్థానం. ప్రతిసారి కొత్త ఫీచర్లతో నూతన వెర్షన్ను వాట్సాప్ అందుబాటులోకి తెస్తుంటుంది. ఈ మధ్యకాలంలోనే వాట్సాప్ ఎన్నో షార్ట్కట్ ఫీచర్లను తీసుకొచ్చింది. తాజాగా మరిన్ని కొత్త ఫీచర్లను ప్రవేశపెట్టనున్నట్లు ఆ సంస్థ తెలిపింది. ప్రస్తుతం టెక్ట్స్, ఫొటోలు, వీడియోలను స్టేటస్లుగా పెట్టుకునే వెసలుబాటు ఉంది. వీటితో పాటు వాయిస్ స్టేటస్లు కూడా పెట్టుకునేలా కొత్త ఫీచర్ను తీసుకురానున్నట్లు వాట్సాప్ తెలిపింది. కొత్త అప్డేట్లో స్టేటస్ రియాక్షన్స్, 100 మంది వరకు ఫొటోలు పంపించే వెసులుబాటును సైతం కల్పించనుంది.
వాయిస్ స్టేటస్
ప్రస్తుతం మనం ఫొటోలనో, వీడియోలనో, టెక్ట్స్ను స్టేటస్లుగా పెట్టుకుంటున్నాం. కానీ వాట్సాప్ ఇప్పుడు ట్రెండ్ మార్చుతోంది. వాయిస్ రికార్డ్ చేసి స్టేటస్లు పెట్టుకునేలా ఫీచర్ తీసుకురాబోతోంది. 30 సెకన్లపాటు వాయిస్ రికార్డు చేసి స్టేటస్గా పెట్టుకోవచ్చని చెప్పింది. ఈ అప్డేట్ను త్వరలోనే యూజర్లకు అందుబాటులో రానుందని వాట్సాప్ ప్రకటించింది. మనం చెప్పాలనుకున్న ప్రతిదీ రాయాలంటే కొంత మందికి ఇబ్బందిగా ఉండొచ్చు. అలాంటి వారికి ఈ ఫీచర్ మంచి ఆప్షన్.
స్టేటస్ రియాక్షన్స్
ప్రస్తుతం వాట్సాప్లో పెట్టిన స్టేటస్లకు టెక్ట్స్, వాయిస్ మెసేజ్ ద్వారా రిప్లై ఇచ్చే అవకాశం ఉంది. అయితే, స్టేటస్కు త్వరగా రియాక్ట్ అయ్యే విధంగా మరో ఫీచర్ జోడించనున్నట్లు వాట్సాప్ తెలిపింది. స్టేటస్ను పైకి స్వైప్ చేస్తే కనిపించిన 8 ఎమోజీలు కనిపిస్తాయని.. వాటిని క్లిక్ చేస్తే వెంటనే మెసేజ్ వెళ్లిపోతుందని తెలిపింది. ఈ ఆప్షన్ ఇప్పటికే బీటా యూజర్లకు అందుబాటులో ఉంది. దీనిని మరింతగా అప్డేట్ చేయనున్నట్లు తెలిపింది వాట్సాప్.
వంద ఫైళ్లను ఒకేసారి
ప్రస్తుతం వాట్సాప్లో 30 మీడియా ఫైళ్లను ఒకేసారి పంపించుకునే వీలు ఉంది. అంతకంటే ఎక్కువ పంపాలనుకుంటే.. సాధ్యం కాదు. పెద్ద సంఖ్యలో ఫొటోలు, డాకుమెంట్లు పంపే సమయంలో ఇది చాలా మందికి ఇబ్బందికరంగా ఉంటుంది. అయితే దీనికి చెక్ పెట్టడానికి వాట్సాప్ కొత్త ఫీచర్ను తేబోతుంది. ఇకపై 100 ఫైళ్లను ఒకేసారి పంపించేలా వాట్సాప్ కొత్త అప్డేట్ తీసుకురాబోతోందని సమాచారం. తొలుత బీటా యూజర్లకు ఈ ఫీచర్ను అందుబాటులోకి తీసుకురానున్నట్లు తెలుస్తోంది.
