గుజరాత్ ఎన్నికల్లో భాజపా చారిత్రక విజయాన్ని నమోదు చేసింది. గత రికార్డులను చెరిపివేస్తూ మెజారిటీ స్థానాలు కైవసం చేసుకుంది. ప్రధాని నరేంద్ర మోదీ నేతృత్వంలోని కాషాయదళం దూకుడుగా నిర్వహించిన ప్రచారాల కారణంగానే ఈ విజయం సాధ్యమైంది. ప్రజలకు మోదీ వ్యక్తిగతంగా అభ్యర్థించడం గుజరాత్లో ఫలితాన్నిచ్చింది. పోలైన ఓట్లలో సగానికిపైగా మోదీ పార్టీకే పడ్డాయి. విపక్షం దాదాపుగా తుడిచిపెట్టుకుపోయింది. మిగిలిన పార్టీలకు అత్తెసరు సీట్లు వచ్చినందున అసెంబ్లీలో భాజపా తీసుకునే నిర్ణయాలకు అడ్డు ఉండకపోవచ్చు. దళితుల అంశమైనా.. బిల్కిస్ బానో కేసు విషయమైనా.. ప్రభుత్వానికి అడ్డు చెప్పేవారెవరూ ఉండరు.
పిల్లి, పిల్లి కొట్టుకొని కోతికి రొట్టెముక్క ఇచ్చినట్టు.. విపక్షాలు.. ఒకరి ఓట్లను ఒకరు చీల్చుకొని అందరూ మునిగిపోయారు. 182 అసెంబ్లీ స్థానాల్లో.. అధికార భాజపా అందులో ఏ ఒక్క స్థానంలో ముస్లింలను బరిలోకి దింపలేదు. హిందుత్వ ఓట్లు దూరమైతాయని ఎవరినీ బరిలోకి దింపలేదు. అయినా గెలుపొంది.. తమ రాజకీయ చతురతకు తిరిగులేదని నిరూపించింది. ఇదిలా ఉంటే, కాంగ్రెస్ ఓటు బ్యాంకును మజ్లిస్, ఆప్ కొల్లగొట్టాయి. దీంతో ఎన్నికల్లో హస్తం పార్టీకి ఘోర పరాభవం తప్పలేదు.
సర్వం మోదీయే..
సూరత్ మున్సిపాలిటీలో ఆప్ బలపడటం చూసి వెంటనే భాజపా అప్రమత్తమైంది. తమ అధికారానికి ఢోకా లేకుండా చేసుకునేందుకు అన్ని ప్రయత్నాలు చేసింది. ఏడాది కాలంగా రాష్ట్రంలో క్షేత్రస్థాయిలో ప్రజల్లోకి వెళ్లింది. మోదీనే ముందుండి రాష్ట్రంలో ప్రచారాన్ని నడిపించారు. "ఈ గుజరాత్‌ను నేనే తీర్చిదిద్దాను" అంటూ మోదీ తన ఎన్నికల ప్రచారాన్ని సాగించారు.
"భాజపా అభ్యర్థి ఎవరు అనేది మీరు గుర్తుపెట్టుకోవాల్సిన అవసరం లేదు. కమలం పువ్వును మాత్రం మదిలో నిలుపుకోండి. మీరు ఓటు వేస్తున్నప్పుడు కమలం పువ్వు కనిపిస్తే, అది భాజపా అనీ, మీ దగ్గరికి వచ్చిన మోదీ అని అర్థం చేసుకోండి. కమలం గుర్తుకు వేసిన ప్రతి ఓటూ మీరిచ్చే ఆశీర్వాదంలా నేరుగా మోదీ ఖాతాలోనే పడుతుంది" అంటూ ప్రధాని ఓటర్లకు విన్నవించారు. పోలింగ్‌కు ప్రజలు భారీ సంఖ్యలో తరలి రావాలంటూ మోదీ ప్రతి ఎన్నికల సభలోనూ చెప్పారు. పార్టీ కార్యకర్తలు సైతం ఇదే తరహాలో ప్రచారం చేశారు. పార్టీ ఏం చేసిందనే విషయాన్ని పక్కనబెట్టి.. గుజరాత్ సొంత బిడ్డను గెలిపించుకోవాలని మోదీ కేంద్రంగా ప్రచారం సాగించారు.
హిందుత్వంతో విజయం..
గుజరాత్ ఎన్నికల్లో భాజపా హిందుత్వ నినాదాన్ని ప్రధానంగా వినిపించింది. మేనిఫెస్టోలోనూ ఆ వర్గాన్ని ఆకట్టుకునే ప్రయత్నం చేసింది. ద్వారకాను పశ్చిమ భారతదేశంలోనే అతిపెద్ద ఆధ్యాత్మిక కేంద్రంగా మారుస్తామని.. ప్రపంచంలోనే అతిపెద్ద శ్రీ కృష్ణుడి విగ్రహం, త్రీడీ భగవద్గీత ఎక్స్పీరియెన్స్ జోన్తో పాటు గ్యాలరీ నిర్మాణం చేపడతామన్న హామీలు భాజపాకు కలిసి వచ్చాయి. హిందూ ఓటర్లు.. భాజపావైపు మొగ్గు చూపేందుకు ఈ హామీలు కారణమయ్యాయి. సాధారణంగా భాజపాకు అండగా ఉండేవారే కాకుండా.. ఇతరులను సైతం ఈ భావజాలానికి ఆకర్షితులయ్యేలా చేసి ఫలితాలు రాబట్టింది.
హిమాచల్లో మాత్రం..
అయితే, హిమాచల్ ప్రదేశ్ విషయానికి వచ్చేసరికి భాజపా హవా కనిపించలేదు. ఐదేళ్లకోసారి ప్రభుత్వం మారే సంప్రదాయం మాత్రం మారలేదు. ప్రభుత్వ ఏర్పాటుకు అవసరమయ్యే సీట్లను గెలుచుకోవడంలో భాజపా విఫలమైంది. హిమాచల్లో ముస్లిం ఓట్లు గణనీయంగా ఉన్న నేపథ్యంలో హిందుత్వ అజెండా పూర్తిస్థాయిలో పనిచేయలేదు. ఎలక్షన్ ఫలితాలను నిర్ణయించడంలో ప్రభుత్వ ఉద్యోగులు ప్రధాన భూమిక పోషించారు. పాత పింఛను పద్ధతిని ప్రవేశపెడతామని కాంగ్రెస్ ఇచ్చిన హామీ వారికి బాగా పనికొచ్చింది. పీకల్లోతు కష్టాల్లో ఉన్న కాంగ్రెస్ పార్టీకి.. ఓ రాష్ట్రంలో అధికారంలోకి రావడం శుభపరిణామమే.
అయితే, గుజరాత్లో అప్రతిహత విజయం సాధించడం భాజపా దీర్ఘకాలంలో మంచి చేసేదే. 2023లో అనేక రాష్ట్రాలకు ఎన్నికలు జరగనున్నాయి. గుజరాత్లో తప్పులను వెంటనే గ్రహించి దిద్దుబాటు చర్యలు చేపట్టిన భాజపా.. ఇతర రాష్ట్రాల్లోనూ మెరుగైన ఫలితాలు రాబట్టాలని అనుకుంటుంది. 2023లో పలు రాష్ట్రాల అసెంబ్లీలకు ఎన్నికలు జరగనున్నాయి. గుజరాత్ వ్యూహంతో మిగిలిన రాష్ట్రాల్లోనూ గెలవాలని ప్రయత్నించే అవకాశం ఉంది. ఈ నేపథ్యంలో విపక్షాలు భాజపాకు గట్టిగా పోటీ ఇస్తాయో లేదో తేలాల్సి ఉంది.
-బిలాల్ భట్(ఈటీవీ భారత్ నెట్వర్క్ ఎడిటర్)
